Diretora Nasionál Rekursu Humanu, Anita Tavares de Jesus hatete, kolokasaun manorin sira iha faze dahuluk no faze daruak Ministeriu Edukasaun konsege konklui ona pagamentu, inklui subsidiu bá kolokasaun inisial no transporte ne’ebé hahú husi loron 14 fulan-Maiu to’o fulan-Novembro tinan ne’e no osan ne’e tama ona bá ida-idak nia konta bankaria.
“Informa bá manorisn sira husi prosesu kolokasaun dahuluk no daruak karik salariu no subsidiu sira seidauk tama iha konta bankaria, husu atu informa lalais mai Ministeriu Edukasaun Diresaun Nasional Rekursu Humanus hodi hare tuir fali prosesu ne’e,” dehan Diretora liu husi konferensia imprensa ne’ebé hala’o iha Sala VIP-ME Vila-Verde, Sesta (22/11).
Nia hatutan, bá manorin kolokadu iha etapa daruak atu aselera prosesu submisaun lista prezensa kada fulan ba ME-DNRH, ne’ebé asinadu husi Diretór eskola sira.
Enkuantu bá manorin kolokadu etapa datoluk nian, tenki aselera lista prezensa kada fulan no labele liu loron 15 fulan-Dezembro 2024, tanba pagamentu sei tama hotu iha fulan Dezembro tinan ne’e.
Entretantu, total manorin ne’ebé minsiteriu koloka ona iha faze dahuluk hamutuk na’in 443 kompostu husi diploma bacherelato 51 no lisensiatura 392, no iha faze daruak total na’in 665 kompostu husi bacherelato 106 no lisensiatura na’in 559.
Enkuantu, faze datoluk total manorin hamutuk total 476 kompostu husi bacherelato na’in 69, lisensiatura na’in 407, no orsamentu ne’ebé ministeriu prevee hodi halo pagamentu ba manorin husi faze dahuluk to’o faze datoluk ho montante hamutuk $1,063,377.00.
