Husi sosiedade sivíl to’o akademista sira hotu-hotu apoiu ho polítika ne’ebé Xefe Governu hahú hanoin atu halo, tanba liu husi dalan ne’e maka sei bele dezenvolve nasaun ne’e di'ak liután ba oin.

Diretór Asosiasaun Asian Justice And Right (AJAR), José Luis Oliveira, hateten, saida mak Xefe Governu planeia hodi halo remodelasaun ba estrutura governu ne’e ideia ne’ebé konstrutivu ho intensaun atu dezenvolve Estadu ho dignu.

Durante observasaun sosiedade sivíl nian, estrutura Governu teek maibé membru balun seidauk iha kapasidade lidera instituisaun Estadu.

Nune’e, bainhira Xefe Governu hakarak remodela estrutura Governu tenke ho modelu estrutura natoon nune’e jere ho di'ak.

“Governu la’o loron 100 ona maibé membru Governu balun hala’o ninia servisu la efisiente ho efikásia”, tenik José, iha ninia knaar, Faról, horisehik.

Membru Governu asume pasta públiku, ne’ebé servisu ho interese ba públiku. Tanba ne’e, tenke iha ema ne’ebé balansu atu lidera governu ho interese povu nian.

Nune’e, nia sujere ba Xefe Governu tenke koloka ema ne'ebé kualidade no iha vizaun ho kapasidade lideransa hodi jere instituisaun Estadu ho dignu, nune’e lori nasaun ba progresu.

Entretantu, Akademista UNTL Fakuldade Siénsia Sosiál, Vitor Soares, hateten, loron 100 liu ona lider órgaun soberanu sira tenke komunika ba malu hodi halo avaliasaun ba membru governu sira.

Avaliasaun ba dezempeñu servisu membru Governu sira laiha rezultadu di'ak, Xefe Governu tenke foti desizaun hodi troka estrutura, nune’e nomeia ema ne’ebé iha kapasidade ba lideransa.

Iha fatin ketak, Prezidente Bankada CNRT, Duarte Nunes dehan, kompeténsia Xefe Governu nian hakarak remodela estrutura Governu la fó impaktu ba AMP.

Nia hatutan, bainhira remodelasaun akontese AMP kontinua eziste, tanba remodelasaun nia benefísiu atu halo mudansa ba Estadu.

Ne’e duni, akontese remodelasaun, fiar katak sei mosu governu unidade nasionál, tanba ne’e pozisaun CNRT kontinua halo diálogu ho Xefe Governu hodi ultrapasa impase polítika ne'ebé iha Timor-Leste.

PM Taur: Ami Seidauk Ajenda

Primeiru Ministru (PM), Taur Matan Ruak, rasik deklara sei halo remodelasaun ba estrutura, maibé to’o ohin loron seidauk halo ajenda hodi determina ninia tempu ba polítika ne’e.

Naturalmente kualkér remodelasaun ida akontese sei informa, Governu rasik labele subar buat ida ba média ka públiku labele hatene.

Tanba ne’e, maka presiza deskansadu hodi hein tempu ne’ebé remodelasaun bainhira mosu sira sei informa.

“Ami seidauk iha ajenda atu halo remodelasaun kona-ba VIII Governu Konstitusionál”, dehan PM Taur, hafoin soru-mutu ho Prezidente Repúblika, iha Palásiu Prezidensiál, Bairru-Pité, horisehik.

Nia esplika, kuandu iha karik remodelasaun, atividade sira ida ne’ebé antes tenke diskute ho instituisaun ne’ebé iha interese ba remodelasaun, tanba membru governu ne’e sustenta husi partidu lima.