Portavós MUTL, Jonés Sege hatete, Xefe Governu apoiu asaun ne'ebé sira halo kontra polítika Parlamentu Nasionál hodi sosa viatura foun ba deputadu sira.

Nia hatutan, meiu barak mak deputadu sira halo mak tenke rekolla viatura tuan ba deputadu sira.

"Buat ne'ebé la justu ami MUTL nunka atu retira, no ami lakohi polítika sira trai povu Maubere iha rai ne'e", dehan nia, iha Palásiu Governu, Sesta (30/11).

Nune'e, Primeiru Ministru mós apela MUTL tenke kontrola polítika Governu ne'ebé utiliza patrimóniu Estadu laiha jestaun.

Portavós ne'e hatutan, bainhira polítika sosa viatura foun tuir loloos ba komisaun sira iha PN hodi halo servisu, bainhira halo fiskalizasaun karreta PN barak loos Deputadu sira uza fiskalizasaun.

Ne'e duni, MUTL kontinua halo asaun protestu bainhira seidauk iha desizaun foun ba polítika sosa viatura foun.

Iha fatin hanesan, membru MUTL, Nóel Bernardino hatutan, Xefe Governu apresia ho asaun protestu estudante sira halo durante ne'e, maibé deputadu sira laiha konxiénsia morál hodi responde ezijénsia ne'e.

Ne’e duni, Governu mós sei kria polítika hodi kombate órgaun lejizlatura sira iha utilizasaun viatura estadu nian ne'ebé la tuir regra.

Nóel dehan, polítika ne'e oinsá halo poupansa ba gastu orsamentu ne'ebé dala barak gasta liu ba viatura de'it, nune'e dezenvolvimentu laiha.

Dezenvolvimentu hahú iha rekursu umanu no la'ós husi sasán, nune'e ezijénsia Xefe Governu nian hakarak tau prioridade ba investimentu rekursu umanu hodi serbí nasaun ho povu Timor-Leste.

Tanba ne'e, MUTL prontu kontinua aprosima ho PN no instituisaun seguransa inklui parte justisa rekolla Prado tuan sira, tanba autoridade sira ne'e hahú identifika paradeiru Prado tuan.

Maski nune’e, diáriu ne’e seidauk iha informasaun formál husi Gabinete Primeiru Ministru nian kona-ba pozisaun Xefe Estadu ba asaun manifestasaun ne’ebé MUTL halo.