“Remodelasaun tenke halo beibeik, bainhira halo remodelasaun sei iha ninia tempu”, dehan PM Taur, iha Uma Fukun Parlamentu Nasionál (PN), horisehik.

Maski Xefe Estadu seidauk konkorda ho naran membru Governu na’in sia ne’ebé propoin ona, maibé Xefe Governu la lakon esperansa hodi kontinua halo diálogu, hodi bele kontribui ba dezenvolvimentu Timor-Leste nian.

Esforsu barak maka PM Taur halo ona hodi konvense Prezidente Repúblika, maibé to’o ohin loron Governu kontinua la'o ho roda tolu, tanba ne’e ultima solusaun ne’ebé sei foti maka halo remodelasaun ba estrutura.

Iha indikasaun forte atu halo remodelasaun, maibé seidauk iha determinasaun tempu bainhira maka bele akontese.

Tanba nu’udar Xefe Governu, Taur sei kontinua esforsu-aan hodi buka solusaun ba estrutura ne’ebé la'o nafatin ho inkompletu.

Entretantu, Sekretáriu Jerál Partidu FRETILIN, Mari Alkatiri hatete, remodelasaun akontese ka lae ne’e kompeténsia Governu nian, tanba planu sira nian atu hadi'a nasaun, bele sura hamutuk mós ho timoroan sira hotu.

Nu’udar partidu opozisaun, FRETILIN lakohi atu hatama ‘kanuru tohar’ ba problema ne’ebé Governu ne’e hasoru, maibé hakarak maka oinsá haforsa instituisaun Estadu hotu atu bele dezenvolve nasaun ne’e.

“Ha’u rasik konkorda no dehan Estadu ida ne’e fraku ba beibeik, ha’u rasik dehan podér polítika Estadu ida ne’e laiha ona”, deklara Alkatiri.

Nia hatutan, saida mak deklara iha públiku la’ós kontra Estadu, maibé intensaun hamutuk ho jerasaun tuan sira hametin estadu, hodi entrega estadu ba jerasaun foun sira tenke la’o hakmatek.

Tanba ne’e, Alkatiri hakarak dalan di'ak mak diálogu hodi fahe ideia atu bele hamosu hamosu ideia koletiva ba dezenvolvimentu nasionál.