Tuir informasaun ne’ebé Jornal INDEPENDENTE asesu husi fonte importante ida, iha 26 Outubru, horseik, Polisia Sientifika Investigasaun Kriminal (PSIK) aprezenta kazu hasoru Naimori, Vise MI, Vise MJ no Prezidente KA ANATL ba Ministériu Públiku (MP).
MP rejistu suspeitu na’in haat ne’ebé deskonfia komete krime Abuzu Poder, Obstrusaun ba Autoridade Públika, Trafiku ho Influensia, Deskamiñu ka Destruisaun Objetu iha Poder Públiku nia Liman, no Favoresimentu Pesoal.
“Polisia Sientifika Investigasaun Kriminal aprezenta ona kazu hasoru suspeitu na’in haat ne’e ba Ministériu Públiku ho númeru NUC.0494/22.PCIC,” informa fonte ne’e, Kuarta (26/10).
Hafoin rejisu iha MP, nia dehan, MP sei halo prosesu hafoin hatuun delegasaun kompetensia ba autoridade sira hodi kontinua prosesu tuir mai.
Bazeia ba Kodigu Penal (KP), iha artigu 297 kona-ba abuzu poder hatete, “Funsionariu ne’ebé abuza poder ka viola obrigasaun, ne’ebé mai husi funsaun ne’ebé nia kaer, atu hetan benefisiu ba nia ka ema seluk ka hamosu prejuizu ba ema seluk sei hetan pena prizaun tinan 1 to’o tinan 4, kuandu dispozisaun legal seluk la haruka aplika pena todan liu.”
Ba krime Obstusaun ba Autoridade Públika iha artigu 243 KP hatete, “Ema ne’ebé, ho violénsia ka ameasa grave hasoru funsionáriu ka forsa military, militarizada ka polisiál nia ajente, la husik nia pratika aktu kona-ba nia funsaun ka halo nia pratika aktu hasoru nia devér sei hetan pena prizaun tinan 2 to’o tinan 6.”
Ba krime Trafiku ho Influensia iha artigu 192 KP hatete, “(1) Ema ne’ebé, nia rasik ka hodi ema seluk, ho nia autorizasaun ka ratifikasaun, husu ka simu, ba nia rasik ka ba ema seluk, vantajen patrimonial ka vantajen ne’e nia promesa, ba nia atu abuza influénsia, real ka suposta, ne’ebé nia ezerse ba entidade públika ruma, sei hetan pena: (a) Prizaun tinan 2 to’o tinan 6, naran katak dispozisaun legal seluk la estabelese pena todan liu, kuandu nia iha objetivu atu hetan desizaun ilisita ruma favoravel; (b) Prizaun tinan ida ka multa, naran katak dispozisaun legal seluk la estabelese pena todan liu, kuandu nia iha objetivu atu hetan desizaun lisita ruma favoravel. (2) Ema ne’ebé, nia rasik ka uza ema seluk, ho nia autorizasaun ka ratifikasaun, fó ka promove vantajen patrimonial ka la patrimonial ba ema sira referida iha númeru anterior atu hetan finalidade referida iha númeru anterior, alinea a), sei hetan pena prizaun to’o tinan 4 ka multa.”
Ba krime Deskamiñu ka Destruisaun Objetu iha Poder Públiku nia Liman iha artigu 192 KP hatete, “Ema ne’ebé destrui, danifika ka inutiliza, totalmente ka parsialmente, ka oin naran ida, subtrai husi poder publiku ne’ebé simu ka kontrola dokumentu ka objetu novel seluk, ka koiza arrestada, apreendida ka objetu iha providénsia sei hetan pena prizaun tinan 2 to’o tinan 6, kuandu norma seluk la fó fatin ba pena todan liu.”
Ikus liu, ba krime Favoresimentu Pesoal iha artigu 290 KP hatete, “(1) Ema ne’ebé, totalmente ka parsialmente, impede, frusta ka ilude autoridade nia atividade probatória ka preventive, ho intensaun ka ho konsiensia atu evita ema ne’ebé halo krime ida atu hetan pen aka medida ba seguransa, sei hetan pena prizaun to’o tinan 3 ka multa; (2) Tentativa fó fatin ba punisaun; no (3) Kuandu funsionariu ne’ebé internen ka iha kompetensia atu inteven iha prosesu ka iha obrigasaun atu ezekuta pena ka medida ba seguransa ka atu haruka halo ezekusaun ne’e mak pratika favoresimentu ne’e sei aplika pena prizaun tinan 2 to’o tinan 5.
Aleinde kazu hasoru Naimori, Vise MI, Vise MJ no Prezidente ANATL, fonte ne’e informa ba kazu osan rihun $130, PSIK submete ona notisia krime ba MP.
“Ba kazu osan rihun $130 ho suspeitu MRMV, CFBB no SMG ne’e rejistu iha 7 Outubru ho númeru NUC.0469/22.PCIC
Entretantu, iha 4 Outubru foin lalais, ekipa konjunta ne'ebé kompostu husi Servisu Nasional Intelijensia (SNI), Servisu Informasaun Polisia (SIP), Polisia Militar, PNTL, J2 F-FDTL, Alfândega no Polisia Sientifika Invetigasaun Kriminal (PSIK) prende osarn cash ho montante rihun $130 ne'ebé sidadaun Timor-Leste na’in tolu ho inisial MRMV, CFBB no SMG, tenta lori sai husi aeroportuu ba Indonezia.
Ekipa konjunta prende osan refere bazeia ba lei númeru 5/2013, artigu 10 kona-ba Brankamentu ba Kapital no Atividade Terorizmu ne’e hatete katak tenke halo identifikasaun ba osan ho montante rihun $10 ba leten ne'ebé liu husi aeroportu no portu.
Hafoin ekipa konjunta prende osan refere, Naimori hamutuk ho Vise Ministru Interior Antonio Armindo no Vise Ministru Justisa, José Edmundo Caetano, hakat ba aeroportu hodi hasoru-malu ho ekipa ne'ebé prende osan refere no husu atu ekipa ne'e entrega fila fali osan ba sira.
Naimori ho Vise Ministru nain rua hasoru-malu ho Diretór Nasionál Servisu Intelijensia, Gastão Piedade, no konsege mosu diskusaun entre sira tanba Gastão konsidera prezensa Naimori ho membru governu na’in rua husi partidu Khunto ne'e nu'udar intervensaun ba servisu investigasaun nian.
Diskusaun entre Gastāo ho Naimori no membru governu ne'ebé nia 'lalin' ba ne'e konsege viral iha media sosial hafoin utilizadór facebook balun públika video ne'ebé hatudu hela diskusaun refere.
Iha diskusaun ne'e konsege deskobre mós katak osan ne'ebé autoridade prende ne'e nu'udar osan husi partidu Khunto ne'ebé atu lori ba Indonezia ho razaun ba sosa nesesidade partidu nian.
Maske hetan intervensaun maibé ikus mai ho orientasaun husi Primeiru Ministru Taur Matan Ruak nu’udar mós Ministru Interior, autoridade sira kontinua prosesa kazu ne’e tuir dalan legal.
