Kestaun ne'e, nia hato'o, hafoin halo abertura ba eventu enseramentu seminariu projetu reforsa hamutuk iha Salaun São José Katedral Dili, ho nia tema “Refleta ba Pasadu, Prepara ba Futuru”,.
Eventu ne’e organiza husi Hivos, Forum Komunikasaun Ba Feto Timor-Leste (Fokupers), no Asosiasaun Chega! Ba Ita (ACbit).
Nune'e, eventu ne’e realiza, inklui loke mós filmajen, seminariu no bazar hodi selebra konkluzaun husi Projetu Reforsa hamutuk.
Enkuantu, projetu ne'e, finansia husi Uniaun Europeia (EU) husi Fulan Fevereiru 2020, ho kontribuisaun montante $ 550,000 (EUR 500,000), hodi promove inkluzauan sosial no dezenvolvimentu ekonomia ba feto sobrevivente no vitima, ne’ebé husi Munisipiu Ainaro, Baucau, Dili, Ermera, Líkisa, Manufahi no Oecusse.
"EU rekoñese katak, feto sobrevivente no vitima sira husi violensia bazeia ba jeneru presiza tulun oioin no apoiu sira hodi fasilita no kura reintegrasaun ba ekonomia no sosiál. Tanba ne’e Reforsa Hamutuk importante tebes ba feto sira. Ohin loron ami selebra susesu sira husi asaun ida ne’e, nomós ita hatene katak viajen ida nee sei la’o hela," dehan nia iha Salaun Katedral, Vila Verde, kuarta horseik (26/10).
Nia hatutan, UE kontinua ho kompromisu hodi apoia parseiru sira ne’e ba Timor-Leste ida ho igualdade liu tan, la husik ema ida iha kotuk.
Enkuantu, ligadu ba obstakulu husi implementasaun projetu nian, Diretora Programa Dezenvolvimentu ba Igualdade Jéneru, Diversidade no Inkluzaun Hivos, Tazia Teresa Darryanto hateten, Projetu ne'e lansa iha tempu hanesan hamutuk ho pandemia COVID-19 nian.
"Projetu ne'e adapta di'ak liu atu sai plataforma ne'ebé di'ak liu ba parte direitu no parte-interesada sira ne'ebé envolve ba fo apoiu ba feto timoroan sira ne'ebé sobrevive husi violénsia", nia dehan.
Entretantu, Diretóra Ezekutivu ACbiit, Maria Manuela Leong Pereira, hatete, Siklone iha Abril 2021 mós sai hanesan dezafiu ida.
“Ami presiza hapara implementasaun projetu ne'e ba tempu balun tanba ami-nia pesoál no sobrevivente sira mós iha tempo hanesan sai vítima no afetadu husi inundasaun no rai-monu,”nia dehan.
Aleinde, Ko'alia kona-ba apoiu ba feto sira ne'ebé sobrevivente, liu husi projetu ne’e, Diretóra Fokupers, Maria Fatima Pereira Guterres, hateten, apoiu husi instituisaun governu barak, lider komunitáriu sira, organizasaun sosiedade sivil no emprezariu sira.
"Ami hein katak apoiu ne'e sei kontinua la'o liu husi projetu Reforsa Hamutuk. Ami iha esperansa boot katak, ministériu xave sira no instituisaun governu sira seluk sei kria planu servisu espesífiku no alokasaun orsamentál hodi apoia feto sobrevivente no vítima violénsia sira tuir kompromisu sira ne'ebé hakerek ona iha Rezolusaun Parlamentu No. 12/10, NAP-GBV 2022-2032, no ODS.
"Iha ninia implementasaun durante fulan 33 nia laran, projetu ne'e suporta ona sobrevivente feto Timor-oan hamutuk 1.269 no emprezáriu mikro sira liu husi treinamentu, bazar, no eventu hari rede sira. Projetu ne'e mós suporta sentru halimar no aprendizajen 4 iha Dili, grupu halimar 1 iha Líkisa no fó treinamentu ba pontu fokál sira hodi fasilita no estabelese atividade halimar no aprendizajen iha munisipiu 5 hodi apoia feto Timoroan sira, liuliu feto sobrevivente sira, hodi fornese edukasaun sedu ba sira-nia oan", hakotu nia.
