Xefe Arnaldo de Araujo hato'o posizaun ne’e relasiona ho karta notifikasaun hosi Polisia Nasionál Timor-Leste (PNTL) liu husi Servisu Investigasaun Kriminál Nasionál, ho númeiru ofisiu 112/Gab/CHEFE / SIC/PNTL/X/2022, ba Diáriu IDEPENDENTE ho nia sentidu “urjente” atu halo identifikasaun ba Jornalista Domingos Gomes ho Xefe Redasaun Jorgino dos Santos, tuir kódigu Prosesu Penál artigu 53 tanba deskonfia komete krimi.
“Notifikasaun ne’e mai atu fó de’it klarifikasaun para hodi hatene lolos de’it infomasaun klean, tanba iha momentu ne’e Komandante Jerál iha hela li’ur, Segundu Komandante mak subtitui hanesan Komandante Jerál mak koalia iha Komandante Jerál nia fatin fó deklasaun iha media se karik koalia, ou lae?, tanba ne’e PNTL notifika hodi bolu mai fortifika de’it informasaun saida mak jornalista hakerek iha titulu jornal nian,” dehan nia ba Jornalista sira, liu husi Konferensia Imprensa ne’ebé hala’o iha Komandu PNTL Kaicoli, kuarta ne'e (26/10).
Nia dehan, karta notifikasaun ne’e la’os kriminaliza produtu jornálistiku maibé atu mai kumpri notifikasaun ne’e hodi fó de’it informasaun ne’e hotu ona, laiha buat seluk.
“Husu ba jornalista sira laran luak mai de’it ba, mai fó de’it informasaun la’os mai para atu kriminaliza ita bo’ot sira lae,” nia hato'o.
Tuir nia katak, kuandu hirak ne’ebé mak temi iha notifikasaun la kumpri notifikasaun ne’e, parte Komandante PNSIK mak sei hatene tanba sira mak hasai notifikasaun.
“Ita sidadaun hotu-hotu tenke mai kumpri notifikasaun no notifikasaun ne’e la signifka katak ita komete ona krimi maibé ita bo’ot sira mai atu fó informasaun de’it hodi klarifika de’it tuir notifikasaun ne’ebé fó ona ba,” katak nia.
Nia hatutan, iha karta notifikasaun ne’e seidauk konsidera produtu ne’ebé jornalista hakerek bele dehan krimi ka la krimi.
“Notifikasaun ida ne’e ha’u hanoin hanesan Komandante Jerál koalia ho ha’u horseik katak, notifikasaun laos konsidera hanesan krimi ida, maibé jornalista sira mai fó de’it deklasaun saida mak jornalista hakerek iha titulu notisia ne’e,” afirma Arnaldo.
Nia dehan, notifikasaun ne’e sai husi Komandu Jerál PNTL liu husi Servisu Investigasaun Kriminál Nasionál, iha asinatura maibé momentu ne’e Komandante mak la tau karimbo.
"Tanba Koomandante Servisu Investigasaun Kriminál Nasionál sai hela ba Lautém entaun delega de’it nia segundu Komandante Servisu Investigasaun Kriminál hodi hasai notifikasaun no karta ne’e konsidera ofisiál duni," nia haktuir.
“Ha’u hanoin karta notifikasaun ne’e sai duni husi komandu PNTL, husi investigasaun Kriminál,” nia hateten.
Enkuantu, hatan kona-ba, Komandu PNTL retira ka mantein notifikasaun ba jornalista sira, Komandante Arnaldo hatete, ne’e depende Komandante PNSIK mak sei haree ida ne’e, tanba nia mak iha kompetensia haree kona ba kestaun ne’e.
“Ha’u somente atu mai hato’o saida mak parte Komandante Jerál fó hateten, atu hato’o ba jornalista kona-ba notifikasaun ba jornalista sira,” hakotu nia.
