"Ho intervensaun lejislativa ida-ne’e ho ninia objetivu atu atinji espansaun setór privadu, nu’udar moto prinsipál ba kreximentu ekonómiku no atu hamenus dezempregu, liu-husi hadi’a ambiente negósiu, diversifikasaun baze ekonómika nasionál no promosaun inkluzaun sosiál no ekonómika," dehan Ministru Presidensial Konsellu Ministru, Fidelis Leite Magalhães, iha Palasiu Governu, kuarta ne’e (26/10).

Nia hatutan, Politika Estratejia ba Setor Privadu ne'e, prevee ba kriasaun Konsellu Dezenvolvimentu Emprezariál ida, ne’ebé inklui entidade governamentál relevante oin-oin ba matéria ne’e, ne’ebé sei sai responsavel ba kriasaun no expansaun empreza sira, programa formasaun nian no sentru sira dezenvolvimentu emprezariál nian.

"Konsellu ida-ne’e ninia misaun mós atu dezenvolve programa espesiál sira atu promove revitalizasaun ba Empreza Ki’ik no Média nasionál sira", nia haktuir.

Governante ne’e fundamenta, Planu Estatejia Setor Privadu ne'e, sei Koordena no implementa tuir polítika ida ne’ebé sei responsabiliza husi membru Governu ne’ebé responsavel ba área koordenasaun asuntu ekonómiku.

"Politika Estratejia ba Setor Privadu ne'e, mos iha kolaborasaun ho membru Governu sira-seluk ne’ebé responsavel ba área relevante ba dezenvolvimentu iha setór privadu".