Enkuantu, projeitu proposta Rezolusaun Parlamentu Nasional (PN) ne'e aprezenta husi Ministra Negósiu Estranjeiru no Kooperasaun, Adaljiza Albertina Xavier Reis Magno.

"Akordu hirak ne’e iha objetivu prinsipál atu garante realizasaun voo komersiál regulár entre Timor-Leste no Indonézia no Singapura, ho hanoin atu promove dezenvolvimentu iha setór ekonómiku, komersiál no turizmu país hirak ne’e nian", dehan Ministru Presidensial Konsellu Ministru, Fidelis Leite Magalhães, iha Palasiu Governu, Kuarta (26/10).

Nia hatutan, akordu sira ne'e hotu kuandu aprova tiha ona husi Parlamentu Nasionál depois notifika nasaun ne'ebé asina kontratu ho Timor-Leste ne'e, entaun tama implementa dadaun ona.

"Maibé hanesan ita haree agora dadaun Quantas iha Timor-Leste, ita regulariza mós aviaun ligasoens ho nasaun vizinus sira, espera katak, situasaun komesa di'ak liu ona, mundu hahú hikas nia aktividade Ekonómikus sira, ita bele normaliza hotu aktividade komersiál aviaun sira ne'e", tenik nia.

Ho nune'e, espera katak, ASA ne'ebé asina bele tama iha vigor, no mós bele avansa dadaun, atu nune'e loke dalan ba iha ligasaun aéreu sira ne'ebé iha Timor-Leste no nasaun sira seluk.

Entretantu, molok ne’e, Governu Timor-Leste ho Kambódia mós estabelese ona akordu servisu aero nian.

Prezidente Repúblika, José Ramos-Horta defende nesesidade atu iha konetividade aerea entre Timor-Leste no Kambódia, hodi fasilita mobilidade sidadaun.

“Akordu ne’e, bolu air service agreement (akoordu servisu aereo) ne’e hanesan akordu umbrella (sombriña), signifika akordu jerál, para bele dezenvolve konetividade aerea, para ita bele iha voo normal entre Kambódia no mai Timor no Timor bá Kambodia” informa Xefe Estadu hafoin sai sasin ba assinatura akordu entre Ministra Negosiu Estranjeiru no Kooperasaun Adalgiza Magno ho Reiñu Kambodia, sesta (21/10).