Ho nune'e, hodi halo  transferénsia osamentu ho montante  millaun $50 husi konta tezouru ba konta bankária ne’ebé loke bazeia ba kontratu ne’e.

Enkuantu, projetu deliberasaun ne’e aprezenta husi Ministru Turizmu Komérsiu no Indústria, José Lucas do Carmo da Silva.

"Liña Kréditu “Fasilidade Garantia Kréditu Suave” ho objetivu atu estabelese garantia kréditu ida kona-ba kréditu ne’ebé sei fó husi instituisaun bankária ba empreza mikru, ki’ik, média no boot", dehan Ministru Presidensial Konsellu Ministru, Fidelis leite Magalhães, iha Palasiu Governu, Kuarta ne’e (26/10).

Nia hatutan, aleinde, iha mós objetivu seluk mak ba fixasaun ba taxa juru remuneratória ne’ebé permite hadi’a kondisaun asesu ba kréditu husi parte empreza ne’ebé opera iha merkadu nasionál.

"Liña kréditu ida-ne’e finansia husi dotasaun dolar amerikanu millaun limanulu, inskrita ona iha Orsamentu Jerál Estadu ba tinan 2022 nian", nia esklarese.