Tuir informasaun husi Komandante Jeral Polisia Nasionál Timor-Leste, Komisariu Fautino da Costa, ne’ebé foin fila husi ninia viajen ba Portugal katak Timor-oan kuaze na’in rihun 5 mak tama ona Portugal. Husi númeru ne’e maioria mak laiha hela fatin no toba de’it iha jadin.
Enkuantu, tuir informasaun husi Ministra Adaljiza, husi Timor-oan na’in 5.000 iha Portugal, na’in 800 de’it mak hasoru problema.
"Timor-oan ne’ebé mak iha Portugál hamutuk 5.000 maibé sira ne'ebé mak enfrenta problema ne'e kuaze 800 de'it, la hetan servisu, laiha kondisaun (atu) selu uma," dehan Ministra hafoin reuniaun ho Primeiru Ministru, Taur Matan Ruak, iha palasiu governu, Tersa (25/10).
Atu solusiona problema ne’e, nia dehan, nia parte hasoru-malu ho PM Taur hodi ko'alia kona-ba preparasaun vizita estadu Prezidente Repúblika, José Ramos Horta, ba Portugál, liu-liu oinsa bele ajuda ko'alia ho Portugál atu bele buka solusaun ba Timor-oan sira ne’ebé daudauk ne’e hela iha nasaun refere.
Iha semana kotuk, nia hatutan, Konsellu Ministru aprova ona medida emerjensia atu evita Timor-oan sira ba Portugal.
"Ita konkorda atu halo kolaborasaun ho parte Portugál hodi bele tau-matan ou hamenus ema ne'ebé mak bele ba Portugál sem garantia ba servisu, depois mós ho suporta medidas ne'ebé mak halo hodi sira bele hetan servisu ho moris di'ak liu tan, se bainhira sira susar atu servisu, governu prontu lori sira fila," katak nia.
Iha fatin hanesan, reprezentante Organizasaun Internasionál Migrasaun (IOM), Aishath Ihma Shareef hatete, IOM mós tenta suporta atu hetan solusaun di’ak hodi ajuda Timor-oan sira ne'ebé daudaun ne’e hasoru problema iha Portugál.
"Ohin hasoru Primeiru Ministru ko'alia kona-ba atendimentu ne'ebé mak bele fó ba Timor-oan sira iha Portugál. Neste momentu Governu Timor-Leste ho Governu Portugál ko'alia hela, IOM mós tenta suporta atu bele hetan solusaun di'ak hodi ajuda ita-nia patriota sira ne'ebé mak hela iha Portugál," hafoin enkontru ho Primeiru Ministru iha Palásiu Governu.
Nia hatutan, IOM tenta haree konseitu viavel atu bele ajuda Timor-oan sira iha termu ne'ebé mak lalais liu mak ajuda sira-nia situasaun.
Iha fatin ketak, Vise Reitór Datoluk UNDIL, Hugo Lourenço da Costa hatete, governu labele fase liman ba problema ne’ebé Timor-oan sira hasoru iha rai li’ur, liu-liu iha Portugal.
"Agora ema hotu luta ba nia dignidade ekonómia, maibé governu abandona tiha ema sira ne'e entaun governu agora tenke sériu ona (tau-matan ba) nia ema sira ne'ebé agora susar iha Portugál," dehan nia iha nia knar-fatin, Tersa (25/10).
Nia sujere atu embaixada Timor-Leste iha Portugal servisu hamutuk ho governu Portugal hodi buka fatin ba Timor-oan sira iha ne’ebá atu sira bele hela hodi buka servisu.
Aleinde ne’e, nia dehan, governu mós presiza kontrola didi’ak ajensia sira iha Timor-Leste ne’ebé haruka Timor-oan ba rai li’ur, tanba realidade hatudu katak Timor-oan barak mak sai vitima ba ajensia hirak ne’e.
"Ita-nia lei fraku tebes, kaer ona ajénsia sira ne'e maibé depois ba Tribunál livre nafatin," nia lamenta.
