Prezidente Autoridade Protesaun Sivil, Ismael Babo informa, tuir dadus kuaze uma-kain iha munisipiu hotu-hotu, inklui RAEOA sofre dezastre naturais.

Munisipiu Aileu uma-kain ida, Ainaro uma-kain 182, Atauro uma-kain rua, Baukau uma-kain ida, Bobonaro uma-kain 38, Kovalima uma-kain ida, Dili uma-kain 23, Ermera uma-kain ida, Lautem uma-kain 35, Likisa uma-kain neen, Manatuto uma-kain rua, Manufahi uma-kain 19, Vikeke uma-kain 12, no RAEOA uma-kain 38.

"Husi 28 Dezembru to'o mai horisehik ita rejistu asidente dezastre naturais ne'e 361 iha territóriu nasionál, iha Munisípiu sira hotu iha territóriu tomak, inklui RAEOA, ita bele dehan barak liu iha ne'e mak Munisípiu Ainaro mak 182, akontese durante semana rua fim Dezembru (to’o) inisiu Janeiru, estragus husi anin boot," dehan nia hafoin hasoru Primeiru Ministru Taur Matan Ruak, iha Palásiu Governu, Kinta (12/01).

Nia esplika, dezastre ne’e provoka husi anin boot, inundasaun, rai halai no ahi haan uma.

"Ita iha tipe apoiu rua, iha apoia emerjensia ninian ita fó apoia hahán no la'os hahán, depois apoiu ida ikus liu mak rekuperasaun bazeia ba asesmentu husi estragus uma ne'ebé aat totál," dehan nia.

Ba apoiu emerjensia, nia hatutan, husi Protesaun Sivil oferese ona ba vitima sira, enkuantu ba apoiu rekuperasaun sei iha faze verifikasaun ba estragus.

"Protesaun sivil liu husi Komandante Operasaun Protesaun Sivil Munisipal sira instaladu ona, imediatu sira responponde ba ita-nia vitima sira," katak nia.

Molok ne’e, tuir informasaun husi Autoridade Protesaun Sivil, iha uma-kain balun iha suku Holarua mak aproveita anin boot hodi sobu rasik sira-nia uma atu bele hetan apoiu dezastre naturais.

Komandante Operasional Autóridade Protesaun Sivil, Inspetór Polisia Nivio Celestinho Jerónimo Baptista informa, tuir dadus inisiu ne’ebé autoridade simu, iha uma 12 iha aldeia Orema no Tirilolo, suku Holarua, mak anin sobu iha semana kotuk.

Bazeia ba dadus ne’e, Nivio hatutan, nia hamutuk ho ekipa verifikasaun tuun direita hodi halo verifikasaun no identifika katak so uma tolu de’it mak sofre duni dezastre.

"Tersa-feira (10/01) tuun direitamente ba iha aldeia Orema no Tirilolo hodi halo identifikasaun, rezúltadu husi uma 12 ne'e, uma 9 la'ós anin mak sobu maibé uma-nain rasik mak ke'e no taa airin dudu uma monu ba rai, ho intensaun hakarak hetan apoiu material konstrusaun husi Governu,” informa Nivio.

Tuir informasaun ne’ebé ekipa APS rekoila, situasaun hanesan ne'e akontese beibeik ona.

“Uma-kain 9 ne'e ekipa la konsidera hanesan dezastre tanba komunidade rasik mak halo manipulasaun,” dehan nia.

Nivio lamenta tebes ho atetude komunidade nian ne'ebé halo falsifikasaun dadus ba dezastra.

Nia apela mós ba komunidade sira atu labele hamosu tan situasaun hanesan iha futuru.

Iha tempu la hanesan, Xéfe Aldeia Orema, Júlio Barros Pacheco rekoñese situasaun ne'e tanba dadus dezastre ne’e komunidade afetadu sira mak lori direita hodi ba aprezenta iha autóridade protesaun sivil Munisípiu, la liu husi lideransa komunitária sira.

“Entaun bele mosu falsifikasaun dadus, tanba ne'e hanesan lideránsa komunitária sente kontente ekipa verifikasaun bele to'o direita hodi halo identifikasaun nune'e bele deteta uma ne'ebé anin sobu no uma ida ne'ebé la'ós anin mak sobu,” dehan nia.