Vise Prezidente Parlamentu Nasionál, Maria Angelina Sarmento hateten,  hanoin la presiza halo revizaun ba lei sira ne’ebé mak iha, tanba artigu ida husi lei Orsamentu Jerál Estadu 2023 nian introdus ona taxa impostu seletivu  ba karreta, bebidas alkolikas, asukar no bebidas asukaradas, aitem-hat ne’e mak faz parte iha taxa impostu seletivu .

 “ Hasa’e taxa hirak ne’e tanba governu maka mai aprezenta iha Parlamentu Nasionál  katak bebidas asukaradas ho alkohol kontribui estraga ema nia saude, la fó garantia ba moris saudavel no ema barak ne’ebé mak hetan moras kardiaku  mai husi konsumu sasan midar sira, entau sira tama ba kategoria atu hetan presu ne’ebé aumentu tanba sira sofre aumentu ba taxa iha diskusaun orsamentu jerál estadu tinan 2023,” dehan Maria Angelina Sarmento iha Parlamentu Nasionál, (11/1).

Nia dehan, nesesidade baziku hanesan fos ho mina ne’ebé nia folin la kontrola tiha ona no loja sira ne’ebe mak faan sasan fora husi aitem haat ne’e, governu mak tenke halo inspesaun hodi hare.

Nia afirma, hanoin governu tenke foti medidas atu halo intervensaun ba presu merkadu, tanba se lae ema ida-idak hasa’e presu merkadu tuir nia gostu, maibé laiha kontrolu no ikus mai kauza ba povu ne’ebé sai konsumidor ba sasan sira ne’e laiha kapasidade kompra.

“Entaun  parlamentu nasonál preokupa ho ida ne’e, tanba ema aproveita ho taxa ba aitem haat ne’ebé mak sa’e. Sira hasae pukul-rata ba aitem hot-hotu, ida ne’e lalos,” nia informa.

Nia fundamenta, ida ne’e akontese  hanesan ne’e tanba sistema kontrolu husi governu rasik la masimu atu ba to’o  loja sira ne’ebé mak faan sasan ne’e  atu fo kedas sansaun.

“Tuir lolos loron ida-ne’ebé  mak kuandu deside aplika taxa konsumu seletivu ne’ebé mak aplika ba 2023. Atu hasae ne’e governu destakadu kedas iha loja sira ne’e, hodi haree aitem sira seluk sa’e hotu ka sira haat deit mak sa’e.  Se sira seluk sa’e hotu,  goverrnu fo kedas sansaun, maibé  agora governu la halo ida ne’e,” nia kestiona