Tuir Ministra Sara katak, pagamentu ne’e laiha prazu, tanba fundu Covid-19 ne’e nia enkuádra iha Orsamentu Jerál Estadu 2020.

Tanba ne’e, nia ezekusaun to’o 31 fulan-Dezembru, laiha limite atu tama fali ninia prosesu.

Ministra Sara dehan, daudauk ne’e tékniku sira husi ministériu finansas asegura hela pagamentu ba pessoál sira ne’ebé servisu iha liña frente liu-liu jornalista sira iha ámbitu Covid-19.

“Última reuniaun antes ita ba Parlamentu, mas parte tékniku sira asegura hela, tanba pagamentu hotu-hotu kuaze ministériu ida-ida servisu hamutuk ho Sekretariadu par bele aprezenta dadus aprezenta naran par hodi halo pagamentu,”dehan Vise MF, hafoin remata enkontru semanál ho Primeiru-Ministru (PM), Taur Matan Ruak iha Palásiu Governu, segundu (19/10).

Governante ne’e hatutan, pagamentu subsídiu suplementu remuneratóriu bá pessoál sira ne’ebé presta servisu durante vijénsia pandemia Covid-19, tuir dekretu Prezidente Repúblika hodi aplika estadu emerjénsia, laiha prazu limitasaun.

Nune’e nia subliña, ba ema sira ne’ebé iha direitu atu hetan simu subsídiu ne’e, define ona iha lei, tanba ne’e, sira iha direitu tomak atu simu, liu-liu subsídiu ba funsionáriu públiku, jornalista, Polísia Nasionál Timor-Leste (PNTL), FALINTIL Forsa Defeza Timor-Leste (F-FDTL), pessoál saneamentu no seluk tan, tanba sira ne’e hotu involve iha servisu liña frente.