Husi total númeru ne’e, Superentedente na’in 120, Inspetor Xefe na’in 111, Postu Inspetor na’in 228, Postu Superentedente Asitente na’in 793, Postu Sarjentu Xefe na’in 817, no Postu Primeiru Sarjentu na’in 569.

Ministru Interior, Francisco da Costa Guterres hato'o parabéns ba membru sira ne'ebé simu ona promosaun diviza.

Nia husu mós ba membru PNTL hirak ne’e atu kontinua kontribui servisu profisional hodi oferese seguransa ba povu.

"Ohin ne'e iha promosaun rua, mais ida ohin ne'e ita lee de'it despaixu, mais depois mak ami sei tula diviza ikus, mais ohin ne'e sira promovidu hotu, sira ajentes foun ona sira ne’e bálun besi kinur ida ba rua, balun rua ba tolu, ajente prinsipal ba ajente xefe. Ida ne'e ita bolu era foun, tanba sira ne’e mak sei kontinuador ba oin ne’e mak sira joven sira ne’e," dehan Ministru iha ambitu selebrasaun aniversariu PNTL, iha Palasiu Governu, Kinta (27/03).

Tuir Ministru, promosaun diviza ne’e iha duni balansu ba jeneru, tanba feto balun promovidu ba ofisial superior.

Iha oportunidade ne’e, Ministru koalia mós kona-ba salariu ba membru hirak ne’ebé hetan promosaun diviza katak sira-nia salariu mós sei sa’e.

"Promosaun Diviza bá membru sira né'e, prepara tiha kleur ona, iha orsamentu ba ida ne'e. Tanba ne’e mak ita-boot sira haree iha tinan ne’e PNTL nia orsamentu la tau barak iha kapital menor no la tau barak iha infraestrutura, tau liu iha salariu vensimentus par atu reorganiza salariu ne’e. Ne'ebé iha orsamentu ba ida ne'e, Komando Jerál prepara ba ida ne’e."

"Mudansa ne’e iha sira-nia diviza no mós mudansa hotu iha sira-nia salariu. Mudansa diviza salariu la sa'e, di'ak liu lalika promovidu. Ne’e iha mudansa hotu kedas, ita reestrutura hotu kedas," dehan nia.

Kona-ba polisia na’in 200 ne’ebé hato’o reklamasaun, Ministru hataan katak sira konsege rezolve ona.

"Ita rezolve hotu ona ne’e mak ohin ita halo promosaun, se ita la rezolve ne’e mós ohin seidauk bele halo promosaun, mais rezolve hotu. Ohin sira barak mak kontente. Sira halo reklamasaun tanba sira barak mak la konkorda, mais depois hadia hotu tiha, ohin buat hotu la'o di'ak," dehan nia.

Iha fatin hanesan, Komandante Jeral PNTL, Komisáriu Polisia Henrique da Costa hatete, kuaze membru PNTL 68% mak benefisia ba promosaun refere.

"Parabéns ba imi hotu. Diviza no farda ne'ebé ita uza ne’e povu nian. Responsabiliza ba diviza ne'ebé imi simu. Tanba depois de promosaun ida ne'e, Komando sei jere hodi koloka imi ba asume kargu iha ne’ebé de’it iha Timor-Leste.”

“Balun uluk sai hanesan kondutor de’it dala ruma nia sa’e liu fali nia Komandante. Ita tenke simu mós realidade ida ne’e. Ida ne’e mak ita bolu katak mudansa. Hatudu nafatin imi-nia disiplina, respeita malu, kamaradajen, unidade, lealdade ba superior sira," Komisariu apela.

Tuir nia, promosaun ne'e fó mós servisu boot ida ba Komando atu nune'e kria formasaun ne'ebe adekuadu nune’e bele ajuda sira hodi asegura diviza foun ne’ebé sira simu.

"Tau iha ita hotu nia neon katak populasaun sira ezije atendimentu polisia nian ho profisional, signifika katak ita tenke hadia kualidade ita nian. Ha’u fiar katak ho apoiu governu nian no kbit ne'ebé PNTL iha, ita bele asegura kualidade atendimentu,” katak nia.

Komandante ne’e hato'o obrigadu ba governu dasia, liu-liu ba Primeiru Ministru, Kay Rala Xanana Gusmão, ne’ebé sempre tau matan ba PNTL.

"Ha'u kontinua konta ho imi atu ita iha unidade ida ne’ebé forte i servisu hamutuk. Unidade bele sai forsa ida de’it hodi asegura nasaun no povu Timor-Leste. Povu Timor-Leste sei apoiu ita, Na’i Maromak sei nafatin tulun ita hotu hodi halo servisu ho loloos no hadok PNTL no Timor-Leste husi hanoin aat sira," dehan Komisariu Henrique.