Sekretáriu Estadu Asuntu Toponomia no Organizasaun Urbana (SEATOU), Germano Santa Brites informa, daudaun ne’e govenu fó tempu ba komunidade sira atu sobu rasik sira nia uma.

Komunidade sira mós provizoriamente ba hela iha Karantina, Tasi Tolu, molok lori sira ba idaidak nia munisipiu.

"Agora daudaun ita fó tempu ba sira atu sobu rasik sira-nia sasán, na'in rasik tenke sobu, sira nia kalen besi no sasan uma laran sira ne'e, tenke hasai ona, agora tempu udan laiha ona halo favór hadia rasik, provizoriamente na'in sira ba lai iha karantina, par depois APC koordena ho Autoridade Munisípal sira par realoka sira ba idaidak nia fatin, see mak hakarak fila ba munisípiu govenu prepara transporte par bele lori sira fila," dehan Germano hafoin partisipa iha aniversariu PNTL ba dala 25, iha Palásiu Govenu, Kinta (27/03).

Germano hatete, bainhira makina sira sobu hotu ona uma iha Kuluhun to'o Bekora, sei ba fali sobu uma iha mota laran husi Ponte CPLP to'o Bebonuk.

"Sira ne'ebé mak iha ne'ebá hela, sasán seidauk sobu ne'e sira-nia problema, kuandu ha'u iha tempu, servisu ida husi Kuluhun ba to'o Bekora, ha'u iha tempu semana ida nia laran, ha'u uza makina par halo rahun sasán sira ne'e par depois bele hadia fatin sira até ponte CPLP ba to'o aeroportu nian no mós Bebonuk."

"Tanba ne'e iha Ponte CPLP ne'e bele iha semana oin no mós fulan oin ekipa sei servisu. Ita servisu tinan tomak hahú husi Janeiru to'o Dezembru, depois ita nain ba programa ka planu ne'e la'o hela de'it, ita husu par hotu-hotu tenke koopera," nia dehan.

Molok ne’e, komunidade afeitadu, Hermenegildo Goncalves informa, hafoin mota tuun no tama iha komunidade balun nia uma no iha 9 Marsu, Primeiru Ministru Kay Rala Xanana Gusmão ba husu atu sira muda provizoriu ba Karantina, Tasi Tolu, komunidade sira hahú sobu rasik sira-nia uma.

Laos de’it ida ne’e, Hermenegildo hatutan, iha 12 Marsu ne’e, ekipa husi governu tuun mós hodi aviza atu komunidade iha mota-laran sai ona husi fatin refere.

"Ekipa sira iha loron Kuarta (12/03) hatete katak komunidade sira ne'ebé mak hela iha ne'e tenke sai ona no fó tempu loron haat atu hamamuk ona fatin ne'e, tanba ne'e mak ami inisiativa sobu rasik ami-nia uma," dehan Hermegildo ba Jornalista Jornál INDEPENDENTE, iha aldeia Moris Foun, Sesta (14/03).

Maske nune’e, nia lamenta tanba autoridade sira seidauk mai hasoru sira hodi koalia kona-ba sira-nia situasaun no laiha karreta mak mai ajuda hodi tula sira-nia sasan ba Karantina.

"Ami sente triste tanba ami-nia sasán sira ne'e sobu laiha ida tuun atu tau netik matan ka ko'alia netik liafuan ruma,.”

“Ami bele ba toba iha ne'ebá mais kasian ba ami-nia sasán. Pokonya ami-nia sasán uma laran ne'e la hasai tomak, agora haree ba sasán mak sei tomak hela hanesan ne'e."

"Estadu dehan sira sei apoiu karreta atu mai tula ami-nia sasán, maibé to'o agora seidauk mai ne'e,” dehan nia.

Iha ketak, Xefe Suku Komoro, Eligio José Marcal informa, iha fulan kotuk ekipa konjunta ne'ebé lídera husi Sekretáriu Estadu Asuntu Toponomía no Organizasaun Urbana halo ona diálogu ho komunidade sira.

Iha momentu ne’ebá, nia dehan, SEATOU hatete sei fó notifikasaun dahuluk ba komunidade sita atu sai. Maibé molok notifikasaun ne’e to'o, inundasaun mak mai uluk nune’e komunidade sira hahú sobu rasik sira-nia uma.

“Iha Sabadu dia 8, kalan tuku hitu bee ida boot tebtebes, liu fali dia 4 (Abril), hakfodak bee maka’as tiha ona i sorte bee tama iha tuku hitu kalan, se tama iha tuku 11, 12 ba leten pasti korban bele iha, maibé grasa a Deus ida ne'e la akontese."

Iha kalan ne’e, nia dehan, sira konsege evakua uma-kain 70 resin. Husi númeru ne’e uma-kain 32 mak hakarak muda ba Karantina, Tasi Tolu.

Hafoin dezastre ne’e, Xefe Suku hatete, autoridade husu ba sira atu sai labele fila ona ba sira-nia fatin ho nune’e sira hahú sobu rasik sira-nia uma.

Nia hatutan, komunidade sira hakarak atu sees an ona husi ne’ebá, maibé problema mak transporte laiha.