Primeiru Ministru (PM) Xanana fó orientasaun refere bainhira hala’o observasaun ba alargamentu estrada iha Fatuhada, Kuluhun, Bekora, Praia dos Coqueiros, Manleuana no Bedudku, iha 24 Marsu ne’e.
Intensaun husi estraga foun ne’e, tuir PM Xanana, atu bele minimiza engrafamentu iha kapital Dili.
“Kalan ne’e kedas imi koordena ho sira Pertamina par loke kedas estrada ida husi Pertamina kotuk ne’e, muda hotu sasan ateru rai par loke estrada ne’e liga ba malu husi Bebonuk nian tesik ba aeroportu,” dehan PM Xanana hanesan INDEPENDENTE sita husi komunikadu imprensa ne’ebé publika iha pajina ofisial PM Xanana nian, Kinta (27/03).
Hafoin simu orientasaun, Ministru Samuel koordena ho Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI, IP) hodi koordena kedas ho ekipa Pertamina Internasionál hahú servisu aterru rai iha Pertamina nia kotuk.
“Kalan ne’e kedas ami hahú servisu ida ne’e,” dehan Ministru Samuel.
Agradese ba komunidade
Primeiru Ministru, Kay Rala Xanana Gusmão hato’o ninia agradesimentu ba komunidade afetadu husi alargamentu estrada.
Tuir Xefe Governu ne’e, komunidade afetadu sira kompriende hodi apoiu servisu ne’ebé governu halo.
“Agradese ita-nia povu tanba sira kompriende hodi apoiu servisu hirak ne’e,” deklara PM Xanana bainhira observa makina pezadu sobu komunidade nia uma iha area Fatuhada.
Enkuantu ba eviksaun hasoru komunidade afetadu iha area Fatuhada no Hudi Laran, Ministru ne’e informa, ekipa halo ona identifikasaun hodi fó kompensasaun tuir akordu ne’ebé povu rasik aseita liu husi dialogu ne’ebé hala’o ona ho partisipasaun autoridade lokal sira.
