Tuir dadus, PR Horta oferese nesesidade baziku hanesan foos, mina, manutolu, inklui roupa, sapatu no sasan seluk ba familia no ema ho nesesidade espesial 850 husi Postu Administrativu Fatumea, Fatu Lulik, Fohorem, Tilomar, Maukatar, Suai Villa, no Zumalai.
"Foin mai vizita Suai, kleur ona la mai, uluk ha'u sempre mai oha ne'e mai halimar no mai pasiar, ohin hahú ho programa ofisiál programa ajuda umanitáriu,” informa PR Horta ba jornalista sira hafoin fahe nesésidade baziku, Kuarta (26/03).
Horta afirma, nia hala’o viajen ba Suai hodi haree de'it situasaun no fó tulun ruma ba kbiit laek sira, liu-liu ba ema ho kondisaun defisiensia.
Apoiu husi PR Horta ne’e la para de’it iha ne’e, maibé sei la’o to’o iha suku no aldeia balun.
Iha fatin hanesan, Xefe Suku Beco, Arlindo Bernardino Lemos sente kontente ho prezensa PR Horta iha Kovalima.
"Komunidade no inan-aman ne'ebé vulneravel bele hetan netik apoiu hanesan ne'e ita sente kontente," dehan nia.
Entretantu, komunidade Suku Labarai ne’ebé simu apoiu, Armindo Araujo de Amaral hatete, nu’udar benefisiariu nia sente kontente simu apoiu husi PR Horta.
"Tanba ha’u nuudar ema ho difisiensia halo buat ruma la di’ak mak Prezidente Republika hadomi ami, fó aihan ba ami, entaun ha’u kontente liu,” dehan nia.
