Porta voz profesor kontratadu Agustinho Pinto liu husi konferensia imprensa hatete, hanesan profesores kontratadu senti triste, tuir lolos iha tempu hanesan hamutuk ona ho estudante sira iha prosesu aprendijazem.
Maibé ME hapara sira nia kontratu sem karta notifikasaun no bandu sira atu labele hamrik tan iha estudante sira nia oin hodi hanorin no eduka estudante sira.
“Husu ba ME no SEESJESTV atu ezekuta ordem Primeiru Ministru nian atu rezolve problema profesor kontratadu 2023 nian la’os hapara,” dehan Porta voz Agustinho iha jardim 05 Maiu Kolmera, Kinta (18/01).
Enkuantu, konaba ba bolsa kandidata, profesor kontratadu husu ba ME atu rezolve uluk problema profesor kontratadu 2023, reklamenta no voluntariu sira nian molok teste bolsa kandidata.
Porta voz haktuir, ohin loron eskola barak mak taka no balun menus profesore tanba Ministra Edukasaun ho Sekretariu Estadu Ensinu Sekundariu uza arogansia hodi hapara profesor kontratadu sira nia kontratu, no la hare ba sakrifisiu no dedikasaun ne’ebé voluntariu sira halo durante tinan sanolu liu ona.
Iha sorin seluk, Diretór eskola 10 Dezembro Komoro Martinho Corsino hatete, iha Eskola Sekundariu 10 Dezembro Komoro iha tinan 2023 profesor kontratadu iha na’in haat no voluntariu na’in tolu mak hamutuk ho profesor permanente hodi hanorin estudante sira.
Maibé ba profesor kontratadu ninia kontratadu remata ona iha loron 31 fulan dezembro 2023, no iha 2024 ministeriu edukasaun la extentende sira nia kontratu no la autoriza sira atu hanorin estudante sira.
Nia dehan, profesor hirak ne’e maioria hanorin iha materia espesilidade hanesan, inglés, portugués, kimika, lian tetun no geolojia,
“Dadaun ne’e iha primeiru klase materia ida profesor voluntariu ma hanorin agora mamuk los husi sala sanolu, segunda klase profesor na’in tolu mak la iha nee’bé atu hanorin lian portugués na’in rua no kimika ema ida, iha terseira klase nain rua ne’eb’e atu hanorin jeolojia ho lian tetun mak la iha,” dehan Diretor eskola.
Diretór afirma, tanba ne’e iha eskola refere bainhira prosesu aprendizajem la’o sei fó impaktu boot ba estudante sira.
