Durante loron rua ona, manorin na’in husi Eskola Sekundariu Jerál Nino Konis Santana Gleno la hanorin estudante désimu anu (100) tanba menus profesór atu hanorin.
“Ami sai husi uma inan-aman atu fó han no osan atu mai aprende maibé to’o iha eskola ami la aprende buat ida to’o fila fali ba uma de’it, horiseik ami mai mos halimar to’o oras to’o ami fila-fali de’it, materia iha maibé profesor mak la iha,” dehan Estudante Constantinu ba Jornalista Online INDEPENDENTE iha Gleno, Kuarta (17/01).
Iha fatin hanesan, Diretór Eskola Sekundáriu Nino Konis Santana Gleno Clementino Madeira hatete, eskola hahú ona prosesu nia aprendijazem iha segunda feira loron 15 fulan Janeiru maibé profesor sira menus tan ne’e estudante sira dadaun ne’e sei abandona hela.
Nia dehan, profesor sira menus tanba profesor kontratadu ne’ebé kontratu remata ona no profesór voluntáriu ne’ebé selu husi kontribuisaun inan-aman mos Ministériu Edukasaun la autoriza atu hanorin tan ne’e eskola refere menus profesores.
“Profesor kontratu iha 2023 hamutuk na’in 10 agora labele hanorin bazeia ba sirkulár, no iha profesár parsiál ne’ebé selu husi kontribuisaun inan-aman nia hamutuk na’in 19 ne’e mós para total, ne’e mak ami problema boot ba ida ne’e,”
Diretór afirma, iha eskola menus profesores sira ne’ebé atu lori materia espesialidade hanesan, Matemátika, Kimika, Biolojia, Portugués Inglés no História.
Reprezentante Veteranus Munisipiu Ermera, Maximiano Casmiro Luis senti triste ho desizaun ME nian ne’ebé hapara profesó sira kontratadu no hasai sirkulár hodi la autoriza profesór voluntáriu sira atu hanorin difikulta tebes ba estudante sira estudu.
“Ohin ha’u mai haree duni ho matan katak eskola ida ne’e profesór la iha atu hanorin estudante sira iha décimu ano bazeia ba sirkulár ne’ebé ME fó sai iha loron 14 Janeiru hodi limita tiha profesór kontratadus ne’ebé mak ami inan-aman sira durante ne’e sustenta fó ami-nia kontribuisaun hodi sira hanorin ami-nia oan,” dehan reprezentante Veteranus.
Tanba durante ne’e, profesor permanente ne’ebé dadaun ne’e hanorin hela iha eskola refere hamutuk na’in 38, no profesor ne’ebé nia kontratu remata ona hamutuk 10 no voluntariu na’in 19, tan ne’e eskola refere presiza tan profesór na’in 29.
