PortaVoz, Profesór Kontratadu Agustinho Pinto hatete, bainhira Ministra Edukasaun Dulce de Jesus Soares no Sekretariu Estadu Ensinu Sekundariu Jeral no Téknika Vokasional Domingos Lemos Lopes la iha vontade no responsabilidade diak atu rezolve profesór kontratadu nain 1.715 nia problema, profesor sira kontinua ezize.
“Se exelensia nain rua la presta vontade no responsabilidade diak ba rezolve problema ne’e, asaun ne’ebé ami sei foti mak asaun marsa pasifika ne’ebé tuir planu sei realiza iha 22 Janeiru, ruan petisaun no manisfestasaun pasifiku,” dehan Agustinho Pintu liu husi konferensia imprensa ne’ebé hala’o iha Jardim 05 de Maiu Kolmera, Kinta (18/01).
Iha fatin hanesan, profesór kontratadu Elisiario Soares Bareto hatete, liu husi asaun hirak ne’e maka ME la iha nafatin seriedade hodi rezolve problema refere, no bainhira ministeriu husik ema seluk hodi prense fatin ne’ebé durante ne’e sira hanorin ba mak konsidera ministra rasik kria funu sosiál iha Timor-Leste.
Tanba ne’e, nia husu ba ME atu rezolve problema refere ho fuan ho implementa metenek ne’ebé Ministra iha.
“hanesan manorin na’in hanoin tiha ona saida mak atu halo iha futuru, ne’e nia (Ministra) mak kria rasik funu sosiál iha Timor, hanoin ho kakutak ka lae, profesor ida hanorin tinan barak ona iha aldeia ida ho dedikasaun no sakrifisiu durante tinan barak ona maibé ikus mai o lori fali ema seluk hodi troka nia fatin ne’e oinsá,” Elisiario Esplika.
Iha biban ne’e mos, profesor kontratadu Cândido da Costa Gomes afirma, bainhira Ministeriu Edukasaun la iha solusaun ba sira-nia problema mak sira prontu atu hasoru situasaun saida de’it.
Nia dehan demokrasia ne’e ba ema hotu tan ne’e ministeriu halo buat ruma labele hare ba kor tanba profesor sira banhira hanorin estdante la hare ba kor.
“Demokrasia ba ema hotu tan ne’e labele haree ba kór tanba ami mai hanorin labarik sira la ho kór, ami mai eduka labarik sira prosesu futuru ne’e la’o oinsa tanba nasaun atu muda só profesor mak bele hatene,” tenik nia.
Enkuantu, asaun pasifiku ne’e sei konvida profesor kontratadu iha teritoriu laran tomak ne’ebé sei hala’o iha resintu ME iha loron rua nolu resin rua fulan-Janeiru tinan 2024.