Porta Voz Ministeriu Edukasaun Filipe Rodrigues hatete, Ministeriu Edukasaun kontinua rona opiniaun no ezijensia husi eis profesór kontratadu 2023 liu husi  dialogu nakloke entre ME no Eis Profesór kontratadu.

Nia dehan, iha dialogu ne’e, parte rua nafatin ko’alia kona-bá interpretasaun ligadu ho profesór sira nia ezijensia no interpretasaun ne’ebé seidauk iha solusaun, maibé Ministeriu Edukasaun nafatin fó oportunidade ba Eis Profesór kontratadu sira atu hasoru malu tan iha loron hirak mai hodi buka solusaun hamutuk.

 “Primeiru Ministru mós haruka karta mai iha Ministeriu Edukasaun no Ministeriu Edukasaun mós responde ona karta Primeiru Ministru nian, ne’ebé ita hein kona-bá asuntu ne’e, solusaun la’o ba oin hanusa ne’ebé ita hein kontaktu husi Ministra Edukasaun ho Primeiru Ministru hodi rezolve asuntu eis profesór kontratadu nian,” dehan Porta voz iha ME Vila-Verde, Tersa (01/10).

Porta voz ne’e esplika, parte rua mos ko’alia ona katak hotu-hotu hakarak aposta ba kualidade edukasaun ba futuru Timor nian.

“Ami hotu konkorda katak desde horseik ami hasoru portavoz no ohin hasoru nia kolega sira hotu, katak hotu-hotu iha konsiensia hakarak aposta kualidade edukasaun ne’ebé di’ak ba Timor iha futuru,” katak Asesor.

Tanba ne’e, Ministeriu Edukasaun espera katak desizaun ne’ebé iha, sei la sees husi aposta kualidade edukasaun iha future.

Nune’e, Ministeriu Edukasaun nafatin loke oportunidade ba se deit mak hakarak sai professor liu husi teste bolsa kandidatu.

Iha fatin hanesan, Porta voz profesor kontratadu 2023 Agustinho Pinto hatete, nia parte hato’o agradese ba maromak tanba odamatan ministeriu edukasaun nian bele nakloke ba sira hodi halo dialogu.

Porta voz mós konsidera, dialogu ne’e hanesan inisiu ida ba sira, no sei kontinua ba oin hodi buka  solusaun ba problema refere.

“Agradese tebes tanba odamatan Ministériu nia loke fali ona mai ami, nune'e ohin ami halo dialogu ba malu. Enkontru ohin ne'e hanesan dialogu inisiu la signifika hetan kedas rezultadu maibé sei nafatin dialogu aproximasaun, ha'u hanoin ida-ne'e mak di'ak,” katak Agustinho.

Entretantu, Portavoz ne’e akresenta, nu'udar sidadaun nafatin la'o ho saida mak iha dialogu ne’e, tanba ne'e apela ba profesór kontratadu sira atu hakmatek hodi hein enkontru tuir mai ho solusaun ne’ebé Primeiru Ministru sei foti no sira sei la’o tuir ida ne’e.