Proposta lei OJE ne’e, entrega direita husi Ministra Finansas Santina Rodrigue no akompaña husi Vise Ministra Finansas no mós Sekretáriu Estadu Komunikasaun Sosial, Expeditu Dias Ximenes, ba Prezidente Parlamentu Nasional, Maria Fernanda Lay iha Gabinete Parlamentu Nasional.
Tuir Komunikadu ne’ebé Online INDEPENDENTE asesu, Primeiru-Ministru Kay Rala Xanana Gusmão hateten, Proposta orsamentál ida-ne'e reflete IX Governu nia kompromisu ba Investimentu iha Infraestrutura estratéjika, hametin ekonomia no hadi’a bein-estár sidadaun sira-nian.
“Objetivu husi programa ne'e mak atu halo balansu ba kreximentu ekonómiku imediatu no hasoru dezafiu prinsipál sira hanesan diversifikasaun ekonómika no hamenus dependénsia ba reseita mina-rai nian." dehan Primeiru Ministru liu husi Komunikandu ne’ebé Online INDENPENDENTE sita, kuarta ne’e (02/10).
Tuir komunikadu ne’e, iha Pontu importante sira husi proposta Orsamentu Jerál Estadu tinan 2025 nian husi alokasaun orsamentál hamutuk millaun $2,617.2.
Husi orsamentu ne’e, ba Administrasaun Sentrál millaun $2,073.0, ba Rejiaun Administrativa Espesial Oekusse Ambeno (RAEOA) millaun $62.2, no ba Fundu Seguransa Sosiál (inklui Fundu Rezerva Seguransa Sosiál). millaun $482.0.
Orsamentu konsolidadu ba Administrasaun Sentrál, RAEOA no INSS (la inklui Fundu Rezerva Seguransa Sosiál) mak millaun $2.177. Orsamentu konsolidadu ba Administrasaun Sentrál no RAEOA hamutuk millaun $2.125. Ida ne'e maka aumentu 12.4% hosi millaun $1.890 ne'ebé aprova ba tinan 2024.
Projesaun kreximentu Produtu Internu Brutu (PIB) husi 4.1% ba 2025, ne'ebé suporta husi aumentu despeza governu nian no investimentu estratéjiku.
Nune’e, Alokasaun signifikativa husi orsamentu konsolidadu ba CA no RAEOA ba setór xave sira, Kapitál Sosiál, millaun $741 (35% husi orsamentu konsolidadu), Dezenvolvimentu Infraestrutura, millaun $654 (31%), Dezenvolvimentu Ekonomia, millaun $157 (7%), Enkuadramentu Institusionál, millaun $574 (27%).
Aumenta investimentu iha kapitál dezenvolvimentu, to'o millaun $440, aumenta millaun $29 kompara ho 2024. Hasa'e fokus ba programa sira kona-ba bein-estár sosiál, inklui transferénsia ne'ebé aumenta ba Fundu Nasionál ba Kombatente sira husi Libertasaun no Fundu Seguransa Sosiál. Investimentu estratéjiku iha infraestrutura turizmu no dezenvolvimentu kampu petróleu Greater Sunrise.
Entertantu, Governu prontu atu defende proposta ne'e no servisu hamutuk ho Parlamentu Nasionál hodi asegura orsamentu ida-ne'ebé forte no efetivu ba benefísiu sidadaun Timor-oan hotu-hotu nian.
