Prezidente Rede Feto Timor-Leste, Zelia Fernandes hatete, Rede Feto Timor-Leste orgullu tanba hetan ápoiu finanseira husi Uniaun Europeia hodi realiza konferensia munisipal no kongresu nasional feto Tmor-Leste.
“Rede Feto Timor-Leste sente kontenti tanba iha momentu ida ne’ebé defisil, iha ne’ebé Rede Feto atu organiza konferensia munispial feto Timor-Leste ninian, maibé Uniaun Europeia ninia reprezentante mai aproxima Rede Feto atu halo diskusaun oinsa mak bele fó apoiu. Uniau Europeia nu’udar parseiru dahuluk ida ne’ebé apoiu Rede Feto hodi loke diskusaun ba iha ápoiu ne’ebé atu fornese ba iha RFTL, nune’e iha prosesu lubuk ida ne’ebé parte rua ne’e liu ona no públiku tomak mos hatene ona katak bainhira aplika ba iha fundu Uniaun Europeia ne’e la’os fasil no la’os mos difisil liu,” dehan Prezidente iha Salaun Rede Feto Kaikoli, Kuarta (02/10).
Nia hatutan, husi prosesu hirak ne’e hotu la’o durante tempu lubuk ida, Rede Feto Timor-Leste hamutuk ho Uniaun Europeia elabora prosesu ne’e no ikus konsege to’o iha pontu konkordansia no to’o asina akordu ho Uniaun Europeia kona-bá fundus ne’ebé sira apoiu ho valór ne’ebé boot.
“Montante ne’ebé Uniaun Europeia aprova ona ba iha Rede Feto Timor-Leste, atu realiza konferensia munisipal no kongresu nasional feto Timor-Leste nia hamutuk 130 mill ital Euro ba iha Rede Feto hodi finansia konferensia iha munisipiu 12 no RAEOA, kongresu nasionál no mós to’o iha programa balun hafoin kongresu nasional,” tenik nia.
Iha fatin hanesan, Reprezentante Uniaun Europeia Christoph Sorg, hatete, Uniaun Europeia mós kontente tebes apoiu Rede Feto Timor-Leste, no fiar katak ho apoiu ne’e bele dezenvolve nafatin sosiedade sivil sira iha TL.
Nia dehan, apoiu ne’e importante tebes ba sosiedade sivil tanba bele ajuda fó advokasia, fornese sujestaun no rekomendasaun ba Timoroan sira, liuliu iha nivel baze hodi dezenvoleve politika no lei sira.
“Kontenti tebes hodi apoiu Rede Feto, iha razaun lubuk ida, no ami fiar katak ida ne’e importante atu nafatin dezenvolve kapasidade no papél sosiedade sivil iha Timor-Leste, tanba sosiedade sivil bele ajuda timoroan sira liliu iha nivel baze no iha munisipiu sira,” katak Reprezentante.
Iha biban ne’e, Reprezentante Uniaun Europeia louva Rede Feto Timor-Leste no nia membru sira, ne’ebé dezempeñu servisu di’ak tebes, bainhira ko’alia kona-bá feto iha TL.
Entertantu, konferensia munisipal sei hahú uluk iha munispiu Baukau iha loron tolu fulan outubru no Kongresu Nasional Feto Timor-Leste ba dala neen sei realiza loron 14 to’o 16 fulan-Dezembro tinan 2024.
