Diretór Gabinete Relasaun Externa, Sentru Nasionál Operasaun Protesaun Sivil (SNOPS), Autoridade Protesaun Sivil (APS), Cesario da Silva Marques informa, dezastre naturais ne’ebé akontese iha loron hitu ne’e rezulta ema barak sai vitima.
Husi dezastre ne’ebé akontese, nia dehan, total uma 40 mak hetan estragus, kompostu husi anin sobu uma 26 no ahi haan uma 16.
Munisipiu hirak ne’ebé sofre dezastre, nia dehan, mak munisipiu Baukau ho kazu anin sobu uma 12 no ahi haan uma-lisan 12, Kovalima anin sobu uma rua, Dili ahi haan uma ida, Ermera anin sobu uma lima no ahi haan uma ida, iha Likisa anin sobu uma haat, no Vikeke anin sobu uma 3.
"Bainhira iha Munisípiu sira akontese (dezastre), ita apoiu kedas emerjensia, maibé apoiu rekuperasaun ba vitima sira ne'ebé lakon hela-fatin ne’e hein prosesu verifikasaun dadus mak ita foin apoiu," katak nia.
Kona-ba kazu ahi haan uma-lisan 12 iha Gariuai, Baukau, APS iha duni iha baze dadus, maibé vitima sira ne'e la elejivel atu hetan apoiu emerjensia husi APS tuir matadalan ne'ebé iha ona.
"Iha dekretu lei númeru 07/2021 ne'e la elejivel ba ita atu fó apoiu emerjensia, inklui uma kos no fatin negósiu ita la fó apoiu emerjensia ba sira. (se) ba uma sira ne'ebé mak sira hela ba mak hetan estragus, sira merese atu hetan apoiu emerjensia ho rekuperasaun," dehan Cesario.
Entretantu, tuir dadus husi APS, hahú husi fulan Janeiru to’o Setembru tinan ne’e uma-kain 3.042 mak sai vitima ba dezastre naturais. Husi númeru ne’e, uma-kain 3.012 mak hetan ona apoiu emerjensia, enkuantu uma-kain 31 seluk seidauk hetan.
Uma-kain hirak ne’ebé hetan ona apoiu emerjensia mak hanesan; uma-kain 33 iha Munispiu Aileu 33, uma-kain 185 iha Ainaro, uma-kain 28 iha Atauru, uma-kain 207 iha Baukau, uma-kain 133 iha Bobonaro, uma-kain 618 iha Kovalima, uma-kain 396 iha Dili, uma-kain 258 iha Ermera, uma-kain 217 iha Likisa, uma-kain 69 iha Lautem, uma-kain 259 iha Manatuto, uma-kain 174 iha Manufahi, uma-kain 120 iha Vikeke, no uma-kain 315 iha RAEOA.
Enkuantu, uma-kain ne’ebé seidauk hetan apoiu mak uma-kain 27 iha Baukau, uma-kain rua iha Dili, uma-kain ida iha Lautém no uma-kain ida iha Atauro.
