PR Horta deklara, ninia prezensa iha suku Waitame atu oferese apoiu balun ba komunidade vulneravel sira.

"Ha'u la'ós atu (halo) vizita boot ida maibé atu lori de'it tulun oan ruma mai grupu elementu vulneravel sira. Ne'e hanesan preokupasaun liu, governu halo, governu nia kna'ar hanesan loke estrada, dada eletrisidade, telekomunikasaun, ospitál, apoiu ba agrikultura, buat sira ne'e."

“Maibé tenke buka kolabora tanba estadu, governu, la biban atu tama sai aldeia sira, fatin hotu-hotu atu iha tempu badak ajuda hadia povu nia moris. Halo daudauk maibé lori tempu,” dehan PR Horta ba benifisiáriu sira, iha Suku Waitame, Segunda (30/09).

Horta dehan, prezidensia repúblika iha programa ida ne’ebé governu apoiu, atu tau-matan ba familia kbiit-laek sira, labarik, inan, joven no estudante sira.

Iha fatin hanesan, Administradór Postu Administrativu Kelikai, Paulo Jacinto Morreira agradese ba PR Horta ne'ebé tuun direitamente hodi fahe nesésidade báziku ba komunidade sira.

Nia informa, benefisiariu ne’ebé hetan apoiu husi PR Horta hamutuk na’in 300 resin husi Suku neen mak hanesan suku Afasa, Abafala, Gurusa, Namanei, Waitame, no Lakuleu.

“Benifisiáriu sira ne'ebé kbiit laek ne'ebé sira simu, balun difisiensia, balun moras todan, struck, no sira ne'ebé laiha kbiit atu halo toos, natar ne'ebé sira merese duni hetan nesésidade báziku husi Prezidente Repúblika," dehan Xefe Suku ne’e.

Benifisiáriu ida, Pedro Coreia Freitas, sente kontente no agradese ba apoiu husi Prezidente Repúblika.

"Se bele programa Prezidente Repúblika nian ne'e labele to'o de'it iha ne'e, hanoin kada tinan mai nafatin iha Suku Waitame ne'e. Tanba ami-nia kbiit ne'e la to'o atu halo toos ho natar," katak nia.