Sekretária Estadu Igualdade Elvina Souza Carvalho, hatete, SEI konsidera programa ne'e importante tebes, tanba prizioneirus barak husi Kovalima no Ermera mak partisipa ona, ho intensaun atu muda sira nia mentalidade.
“Programa ne'e importante tebes, tan ne'e fiar katak ita boot sira sei iha esperansa, ami fiar katak los duni ita boot sira ne'e tanba desizaun sira ne'ebé foti iha tempu ba kotuk kontra oituan ita nia lei ne'ebé vigora hela, tan ne'e ita boot sira mai ne'e atu kumpri,” dehan Sekretária Estadu Igualdade, iha abertura formasaun ba Prizoneiru sira iha Prizaun Bekora, segunda ne’e (04/09).
Governante ne’e dehan, prizoneirus sira ne'ebé hela iha prizaun prinse mós partisipativu iha dezenvolvimentu tanba iha prizaun iha mós atividade ekstra lubuk ida hanesan kursu karpintaria, pedreiru, kursu lian no kompotadór.
Nia dehan, husi formasaun hirak ne'e, signifika katak bainhira tama ona iha prizaun, hanesan sidadaun no estadu iha obrigasaun atu tau matan nafatin ba sira.
“Tama ona iha ne'e maibé nudar sidadaun ida estadu nafatin iha obrigasaun atu tau matan nafatin ba ita boot sira, tanba parte husi sosiedade, ita boot sira hotu no aban bainrua fila-fali ba sosiedade,” katak nia.
SEI afirma, programa ne'e hahú husi VI Governu Konstitisionál no ema barak mak partisiapa ho ninia intensaun atu bele muda mentalidade prizioneirus sira nian, tanba ne'e uza oprtunidade ida ne'e ho di'ak atu hariku koñesimentu.
Nia dehan, Governu sei la haluha prizioneirus sira, nafatin tau matan ba sira tanba sira hola parte husi sidadaun no sosiedade ida ne'e.
Iha fatin hanesan, Diretór Nasionál Servisu Prizionais no Reinzersaun Sosiál, Ministériu Justisa, Delfio Alves hato'o agradese ba Sekretáriu Estadu ba Igualdade ho nia ekipa ne'ebé nafatin mai ho komitmentu atu halo kontinuasaun ba atividade programa formasaun kontrolo hahalok hirus, ne'ebé kontinusaun kada tinan sempre fó ba prizoneirus sira.
Tan ne'e, Diretór husu ba prizoneirus sira atu partisipa formasaun ne'e ho sériu no atensaun hodi bele aprende kona ba saida mak kontrolo hahalok hirus.
"Impaktu saida mak ita labele kontrola, benefisiu saida mak ita hetan bainhira ita bele kontrola ita nia hirus, maneja, ita halo jestaun, sei aprende kona-ba saida mak impatia no simpatia, ne’ebé husu ba ita boot persediarius, maibé akompaña no uja nafatin ita nia konsensia nudar umanu, uza nafatin ita nia konsiderasaun atu respeita ema hodi bele aprende. Ida ne'e mak esforsu no vontade governu nia.
Diretór hatutan, bainhira fila ba komunidade no familia lori ona saida mak sira aprende sai hanesan bukae ida ba sira atu nune'e kontrola nafatin hodi labele hanoin fila-fali ba fatin ida ne'e.
