Vizita Pham Minh Chinh iha TL, ne’e hanesan vizita ofisiál tanba foin lalais Prezidente Repúblika, José Ramos Horta hala’o vizita ba Vietname konsege hasoru malu no ko’alia kona ba hametin relasaun diplomátika, inklui diskusaun kona ba kooperasaun no dezenvolvimentu rejionál.
“Prezidente Repúblika foin dadaun ba Vietname hala’o enkontru ho Pham Minh Chinh kapas tebtebes. Vietname hanesan amigu di’ak ba TL. Tanba ne’e Primeiru-Ministru Vietname sei mai Timor, ita sei haree posibilidade saida mak ita bele koopera,” dehan PM Xanana liu husi Komunikadu ne'ebé Online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Kinta (06/03/25).
Xefe Governu hatutan, Vietname hanesan nasaun amigu ida ne’ebé ajuda tebes Timor-Leste bainhira enfrenta krize ai-han iha tinan 2009.
Xefe Governu relembra katak, iha momentu ne’ebá Timor-Leste iha situasaun difísil oinsá mak bele hatama ai-han hodi bele ajuda povu ne’e.
Iha momentu ne’ebá Kay Rala Xanana Gusmão ba to’o Vietname no konsege ko’alia no estabelese kooperasaun ida hodi sosa foos hosi Vietname no fa’an fali ho presu kiik atu bele fasilita povu Timor-Leste bele asesu.
“Iha tempu ne’ebá ita konsege rezolve duni problema falta ai-han, enkuantu iha nasaun seluk halo manifestasaun beibeik tanba ai-han laiha,” Xefe Governu hateten.
Entretantu, kona ba vizita Primeiru Ministru Vietname, Pham Minh Chinh mai Timor-Leste, sei iha hela faze koordenasaun entre Governu nasaun rua atu bele deside data fixu.
Rekorda katak, iha loron, 05 Setembru 2023, Primeiru-Ministru, Kay Rala Xanana Gusmão realiza enkontru bilaterál ho Primeiru-Ministru Vietnam, Pham Minh Chinh hodi deskute no hametin kooperasaun rai rua ba oin.
Xefe Governu Xanana agradese ba kumprimisiu Governu Vientnam nian hodi haruka Kompaña telekomunikasaun Telemor loke investimentu telekomunikasaun iha Timor-Leste hamutuk ho Timor Telekom no Telkomcel Indonézia hodi netraliza merkadu telekomunikasaun bele baratu no atende estadu no sosiedade iha mundu teknologia telekomunikasaun nian.
Enkuantu, iha enkontru ne’e, Xefe Governu rai rua ne’e mós deskute ba futuru Vietname bele kontinua apoiu Timor-Leste hodi dezenvolve setór agrikultura, tanba durante ne’e Vietname sempre importa foos, hodi faan iha merkadu Timor-Leste no sei kontinua fó apoiu ba malu.
Enkontru Xefe Governu rua ne’e, asiste direita husi Vise Primeiru Ministru no Ministru Koordenador ba Asuntu Ekonomiku, Ministru Turizmu no Ambiente, Fransisco Kalbuadi Lay, Ministru Negosiu Estranjeirus no Kooperasaun, Bendito dos Santos Freitas no Ministru Interior, Fransisco Guterres.
