Orientasaun ne’e simu direta hosi Prezidente KFP, Agostinho Letêncio de Deus hamutuk ho Komissáriu sira bainhira atualiza servisu liga ho planu IX Governu Konstitusionál nian.
Prezidente KFP, Agostinho Letêncio de Deus, hatete, sira hasoru Primeiru-Ministru atu relata servisu sira liga ho planu prinsipal governu nian, kona-bá Reforma Administrasaun Públika.
“Ami relata servisu sira liga ho planu prinsipál Governu nian, ida maka reforma administrasaun públika no KFP hola parte kiik ida iha reforma rekursu Umanu. Xefe Governu orienta atu kontinua reforma administrasaun públika iha parte rekursu umanu la’ós servisu ne’ebé kamán maibé komplexu tebes. Entaun, Xefe Governu motiva nafatin KFP atu servisu ho didi’ak no kualidade,” dehan, Agostinho Letêncio de Deus liu husi Komunikadu ne'ebé Online INDEPENDENTE asesu iha Pájina ofisiál Primeiru-Ministru Kay Rala Xanana Gusmão sesta ne’e (07/03/2025).
Pontu prinsipál sira ne’ebé KFP atualiza bá Primeiru-Ministru maka servisu ne’ebé KFP hala’o durante ne’e, ida maka Parlamentu Nasionál (PN) autoriza ona liga ho reforma obrigatóriu, konsege define ona promosaun tuir atividade, no servisu prinsipál seluk maka forma ona ekipa Task Force entre KFP ho Ministériu Finansas (MF).
KFP iha ekipa ida ne’ebé servisu hamutuk ho Ministériu Edukasaun, Ministériu Saúde no halo ona konsultasaun ho parte relevante atu dezenvolve matéria bá teste sira tantu teste promosaun no rekrutamentu.
Pontu seluk, KFP atu halo mós konsultasaun bá servisu balun ne’ebé tenke halo bá oin, ezemplu ko’alia kona-bá formasaun karáter bá funsionáriu públiku sira.
KFP halo re-ajustamentu bá karreira bazeia bá orientasaun Primeiru-Ministru nian liga oinsá atu define fila-fali instituisaun sira tantu Instituisaun Públiku (IP) ho Empreza Públiku (EP).
Durante enkontru, KFP konsulta ho Xefe Ezekutivu no simu orientasaun ligadu ho servisu ne’ebé Komisaun hala’o ho liña ministeriál sira liu-liu Ministériu Finansas.
