Enkuantu, Medalla ne’e bazeia ba Dekretu-Lei No 20/2009, de 6 de Maio, hodi rekoñese sidadaun nasionál, estranjeiru ne’ebé presta ona atividade profissionál, sosiál no espontánea kontribui signifikativamente ba benefísiu Timor-Leste, Timor oan no umanidade.

“Honra no previlejiu boot ba ha’u simu medalla husi sua Exelénsia Prezidente Repúblika Timor-Leste, medalla ne’e ba ha’u, maibé mós ba kolega sira, ha’u-nia rain rasik. Durante tinan tolu, hasoru dezafiu tanba situasaun pandémika, serka sanitária, klimátika no impasse polítiku. Maske nune’e Tailandia no Timor-Leste kontinua programa no diálogu. Ha’u hakarak destaka projektu sanitáriu no atividade atu hasa’e padraun moris estudante nain no labarik iha Hera, Ermera no Baucau,” haktuir Ekapol Poolpipat, iha komunikadu ne’ebé Online INDEPENDENTE sita.

Entretantu, Reinu Thailándia reafirma komprimíssu atu haforsa kooperasaun ho Timor-Leste, hodi konsolida liu-tan preparasaun rekursu umanu Timor-Leste nian, hodi adere ba ASEAN.

“Ha’u fi’ar katak, tinan hirak mai relasaun sei forte liu-tan, hanesan Timor-Leste sai membru ba ASEAN, Tailándia apoia ona programa kapasitasaun ba Timor-Leste, hodi sai preparadu liu tan no sai membru plena ba ASEAN, ha’u fiar katak, Tinan hirak mai Timor-Leste sai sai membru plenu ASEAN nian. Iha mos formasaun online ba kooperativa sira, treinamentu oi-oin no bolsu estudu ba grau mestradu” fundamenta diplomata ne’e.

Tuir Embaixadór, iha ámbitu relasaun diplomátika entre Timor-Leste no Tailándia ba tinan 20, organiza atividade komemorativa, reflorestasaun no kuda Mangrove iha Metinaro no Hera no mós organiza semináriu no seluk tan.