Aleinde, Governu Timor-Leste mós sei kontribui dolar amerikanu tokon $64 ba projetu refere.
Residente Country Director MCC, iha Timor-Leste, Gretchen “Gigi” hatete, projetu ida ne’e hanaran projetu kompaktu ne’ebé servisu hamutuk entre Governu Timor-Leste no MCC.
Nia dehan, projetu ida ne’e dezenvolve rasik husi Governu TL, iha área rua, ida mak bee saneamentu ho drainajen, no seluk mak edukasaun ne’ebé foku liu ba iha nivel ensinu sekundaria, teknika vokasional no mós formasaun ba profesores no lideransa eskola sira.
Projetu entre MCC ho Governu TL sei estabele mós entidade ida hanaran Millennium Challenge Acount, ne’ebé sei servisu hamutuk ho instituisaun Governu nian hodi bele implementa projetu rua ne’ebé mensiona.
Nia esplika, projetu bee saneamentu ho drainajen, sei implementa husi entidade Governu nian naran Bee Timor-Leste no projetu edukasaun sei implementa husi Ministeriu Edukasaun Juventude no Desportu.
“Governu Amerikanu liu husi Millennium Challenge Corporation sei kontribui dolar amerikanu tokon $420 no Governu Timor-Leste sei fó mós kontribuisaun ho montante dolar amerikanu tokon $64, hodi bele implementa projetu rua ne’ebé mensiona,”dehan nia iha salaun FONGTIL, Kaikoli, kuarta (07/06).
Nia akresenta, Millennium Challenge Acount sei responsabiliza ba implementasaun projetu MCC ho Governu TL nian, ho nune’e dadauk ne’e iha hela prosesu nia laran atu halo rekrutamentu ba iha ekipa MCA nian antes Governu TL hili no estabelese ona MCA nia membru konsellu sira atu servisu hamutuk hodi rekruta MCA nia estaf sira.
Iha fatin hanesan Direitór Ezekutivu FONGTIL, Valentin da Costa Pinto hatete, iha fulan-Juñu tinan kotuk Governu TL asina ona kontratu ho ho Governu Estadus Unidus Amerika liu huis MCC ho orsamentu ida ne’e ne’ebé ho montante boot hodi aloka ba iha setor edukasaun no infraestrutura bazika.
"Osan ne'ebé iha, hakarak investe ba buat diak iha ita nia rain, liliu atu mellora diak liu tan setor sira iha área edukasaun no infraestrutura,”dehan Ezekutivu.
Entretantu, projetu ne'e sei hahú implementa ba iha Munisipiu Dili no sei kontinua ba Munisipiu Aileu, Likisa, Manatutu no Ermera.
