Enkuantu, Munisipiu sira ne’ebé hetan viatura ne’e mak hanesan, Aileu, Ainaru, Bobonaru, Manufahi, Likisa, Lautem, Vikeke, Atauro, Dili no Ermera.

“Ohin entrega ekipamentu espesiais, hanesan kareta kombate insendiu nian no  Bombeiros ba iha munisipiu 10,” dehan  Sekretariu Estadu Protesaun Sivil, Joaquim Martins Gusmão iha edifisiu APC kaikoli, kinta (08/07).

Nia haktuir, iha 2021 konsege halo manutensaun ba kareta komando 5 no auto eskada ida. Iha 2022 SEPS konsege halo manutensaun ba kareta espesiais bombeiros lima ho kareta tanki espesial.

No iha tinan ida ne'e (2023) kareta prontu sokoru media nian 10, kareta komando 14 no auto eskada ida.

"Ida ne'e komitmentu husi Oitavu Governu konstituisional no komitmentu ida ne'ebé mak Primeiru Ministru Taur Matan Ruak tau importansia ba iha dezenvolvimentu APC nian, hanesan pilar terseiru ba iha seguransa nasional," dehan nia.

Tanba ne'e, Sekretariu ne'e husu ba komando Protesaun sivil munisipiu no motorista sira atu kuida didiak ekipamentus hirak ne'e hodi bele responde ba komunidade sira nia presiza.

"Tanba kareta sira ne'e ita hola ho osan povu nian, osan estadu nian, tanba ne'e mak ita hotu iha responsabilidade  ne'ebé boot atu kuida sasan sira ne'e, hodi bele apoiu ba komunidade sira," katak nia.

Nia dehan, ekipamentus korpu bombeiros ne'ebé dadaun ne'e iha liu ona tinan sanolu, ninia kondisaun lapermite atu uza tan, tanba ne'e mak halo matensaun foun ba kareta espesial sira ne'e, hodi bele moderniza no hadiak liutan ekipamentus ba iha bombeiros hodi bele atende lalais komunidade ne'ebé persiza.

Nia esplika, Protesaun sivil servisu ida ne'ebé importante tebes, lahanesan ho servisu babain, tanba persiza atensaun másimu, bainhira akontese buat ruma, presiza Protesaun Sivil tenki to'o kedas iha fatin hodi fó apoiu.

Entretantu, molok ne’e, Sekretariu Estadu Protesaun Sivil, distribui ona bombeiru ba Munisipiu Baukau, Kovalima, Atauro no RAEOA.