Ministru Tiágo Amaral garante ida-ne’e tanba iha fulan-Fevereiru no fulan-Marsu liubá, Governu liuhosi Ministériu Justisa halo ona negosiasaun ho Kompaña Internasionál Thales ho Visimitra no iha fulan-Abrí liubá, KM aprova ona dezeñu sira bá seguransa nian.
Prosesu sira tomak mak halo kompaña internasionál ne’e, Ministériu Justisa hala’o tuir lei rejíme aprovizionamentu foun no prosesa dezde kedan iha fulan-Janeiru 2023.
Prosesu ne’e lalais liu, fulan sia (9), tuir loloos, prosesu ne’e lori tempu tinan rua ka tinan ida fulan ualu (8).
“Ami halo negosiasaun, ikus mai sira aseita, fulan-sia. Entaun, iha fulan-Abríl, fulan-Marsu, asina tiha kontratu, no Visi Mitra ho Thales, no iha fulan-Abríl, fulan ida de’it, asina tiha no aprova kedas dezeñu ho seguransa. Iha fulan-Agostu agora, Ministru Justisa foun, tenke halo viájen ida bá Finlándia para depois halo aprovasaun finál bá passaporte eletrónika. Aprovasaun finál ona maka, iha fulan-Setembru, empreza foin bele haruka mai,” dehan nia, hafoin remata reuniaun Konsellu bad ala ikus, iha Palasiu Governu, kuarta (07/06).
Ministru Tiágo dehan, prosesu ida ne’e lalais liu ona. Hahú kedan iha 2015, Kompañia Thales duni mak fornese kaderneta pasaporte eletrónika ne’e bá Timor-Leste, maibé, prosesu atu emite pasaporte ne’e lori tinan-rua, 2015 to’o 2017.
“Agora, iha kazu ida-ne’e, iha tinan 2023, ami rezolve ona, hein de’it, to’o fulan-Setembru, tuir loloos, buat ne’e, rezolve tinan rua antes liubá, prosesu pasaporte ne’e la fásil. Ne’e kompañia Thales Internasionál rasik ko’alia, ita hothotu hatene, Austrália, Indonézia, Malázia, Singapura, pasaporte eletróinika ne’e mós, depende bá sira hotu,"tenik nia.
Molok ne’e, Ministru Tiágo Amaral deklara katak, iha totál kaderneta pasaporte eletrónika TL nian hamutuk rihun 150 mak deskonfia ‘lakon’ de’it iha Diresaun Jerál Servisu Rejistu Notariádu (DJSRN) nia fatin.
Husi deskonfiansa ne’ebé mosu, ikus mai Ministru Tiágo Amaral rasik, hola pozisaun, hodi orienta Gabinéte Inspesaun no Auditória (GIA) iha ministériu koordena ho autoridade polisial, liu-liu Polisia Sientifika Investigasaun Kriminal (PSIK) hodi bele buka tuir kauza husi situasaun ne’ebé mosu.
“Ha’u nu’udár Ministru Justisa ne’ebé foin pose iha fulan-Marsu 2022, mai para rezolve problema. Tanba ne’e, rezultadu kona-bá averiguasaun, sei fó sai iha loron hira mai, para depois públiku hatene, tanba iha fulan-Marsu, ha’u hasai despaixu ida para depois halo averiguasaun lalais, buka tuir nia fukun, pasaporte ne’e nia problema, nia hun loloos ne’e, iha ne’ebé. Entaun, hetan ona, no lakleur publika sai”.
