Aniceto Guterres konsidera hanesan Onra-boot ida iha âmbitu selebrasaun loron proklamasaun independénsia 28 de Novembru ne’ebé eroi boot sira ho aten-brani no firmeza proklama Timor-Leste nia independénsia liu-husi Comite Central da FRETILIN (CCF) iha tinan 47 liu-bá.
"Ohin ha’u reprezenta Orgaun Estadu tomak, hodi marka prezensa iha fatin ida nee, hodi hola-parte iha inaugurasaun Uma ba Kbiit Laek (UKL) iha Suku Sau hamutuk 10 ne'ebé nia orsamentu gasta $333.000 ba benefisiáriu ho totál nain 49, feto nain 27 no mane nain 22," Jornalista sita deklarasaun Aniceto iha Komunikadu, Domingu (27/11/2022).
Alende ne’e, konstrusaun estrada betaun iha aldeia Belebatu (Malarahun) ho orsamentu $ 34.300, totál benefisiáriu nain 283, feto 144 no mane 139, no mós programa sira seluk hanesan rehabilitasaun ba irrigasaun ho naruk metro 337 ne'ebé abandona iha tinan barak nia laran, irrigasaun refere gasta osan $43.610 benefisiáriu hamutuk 887, feto 420 no mane 467.
"Agradese tebes ba Ministériu Administrasaun Estatal (MAE) nia konvite no husu atu inaugura simbolikamente programa hirak ne’ebé MAE implementa iha territoriu tomak, partikularmente ohin iha Manatutu," nia haktuir.
Timor-Leste nia Lei-inan (Konstituisaun) artigu 58, "garantia hela-fatin ba sidadaun no nia família sira iha direitu atu hetan hela-fatin ho dimensaun di’ak, moos no konfortu, atu bele iha intimidade ba ema idak-idak no privasidade familiar.
"Ho bazé ba espíritu artigu ida nee mak, depoizde FRETILIN ba viabiliza Oitavu Governu Konstituisionál ne'ebé lidera husi Jenerál Taur Matan Ruak, na kualidade hanesan Primeiru Ministru, iha nível plataforma, iha konsensu atu avansa ho programa Uma ba Kbiit Laek," subliña.
Programa ida ne'e, bainhira lori mai Parlamentu Nasionál hetan apoiu másimu husi Deputadus sira, iha tinan 2021 PN aprova orsamentu millaun $25 ital hodi konstrui uma 1,254 uma UKL iha Suku 424, Kada Suku hetan uma UKL 3, no iha tinan 2022 ni’an, PN mós aprova no aumenta osan ba uma UKL ho millaun $84,7 hodi konstrui uma UKL 4,000 no kada Suku sei hetan uma UKL entre 9-10.
