Tuir kontratu ne’ebé mak empreza K2K Correia 83 Unipessoal Lda, selebra ho Ministériu Turismu, Komérsiu no Indústria iha suku Bairo Pite sei fahe ba benefisiáriu hamutuk 7.469 kompostu husi aldeia São Jose Nazare ho benefisiáriu 662, Tane Timor benefisiáriu 960, aldeia Teki-Teki benefisiáriu 665, aldeia Timor Cnmanec benefisiáriu 892, aldeia Transporte Air ho benefisiáriu 1.403 aldeia Wedalalak ho benefisiáriu 1.403 no aldeia Xamatam ho benefisiáriu 831.
Husi dadus hirak ne’e iha prosesu distribuisaun bele iha aumentu no menus, tanba dadus komunidade sira iha sempre iha mudansa.
Xefi Suku Bairo Pite João Baptista da Costa Belo, hatete, planu governu nian hodi hamosu sesta bázika ne’e di’ak tebes, sé diak liu, nia sujere atu programa refere iha kontinuidade. Nune’e motiva liután komunidade sira atu hasa’e produsaun alimentar iha rai-laran no ajuda ekonomia povu nian.
“Ha’u hanoin iha distribuisaun produtu lokál ne’e iha rai-laran barak liu, ne’e diak liu, tanba ne’e komunidade sira ne’ebé hela iha foho bele halo natar halo to’os, kuda liis, feuk-ropa. Ha’u haree kuandu ba oin maka komunidade sira agrikultór motivadu liután hodi hasa’e produsaun barak liutan,”Online INDEPENDENTE sita iha komunikadu, kuarta ne’e (30/11).
Nia hatutan, maske iha lamentasaun husi komunidade balu konaba produtu lokál maibé tanba produtu barak mak tau hamutuk no bazeia ba kuotasaun. Tanba ne’e, komunidade sira kontinua simu.
Kona-ba komunidade sira ne’ebé naran latama iha lista benefisiáriu, xefi suku sei esforsu hodi halo reklamasaun nune’e sira bele simu sira nia direitu.
Ho nune’e, Xefi Suku Bairo Pite agradese tebes ba Oitavu Governu tanba iha programa di’ak hodi rekopera ekonomia rai laran hafoin Timor-Leste hasoru pandemia COVID-19 no kalamidade públiku.
“Ha’u haree governu ida ne’e nia programa diak liu tanba kada tinan apoiu nia povu sira husi sesta bázica, $200, halo uma kbiit laek, tanba ne’e ha’u husu ba governu seluk mai diak liu kontinua nafatin programa ne’e,” Xefi Suku, hato’o.
Iha fatin hanesan Diretór kompaña K2K Correia 83 Unipessoal Lda, Nazario Jacinto Correia, hatete, durante preparasaun sosa produtu lokál empreza timoroan feto no mane hamutuk 20 resin.
Aleinde ne’e, empreza iha komitmentu ezekuta servisu tuir kontratu katak sosa produtu lokál atu fahe ba povu tenke hetan pursentu hitunulu resin lima (75%).
Tanba ne’e, empreza hala’o kordenasaun ho organizasaun sira hanesan MOCATIL hodi sosa komunidade sira nia produtu.
“Ami nia preparasaun durante ne’e ami la’o tun iha baze sosa produtu barak husi komunidade sira, no produtu balu ami sosa husi MOCATIL, produtu fos rai ami sosa husi Baucau, Suai, Ikan maran sosa husi Atauro, karau ami sosa husi Natarbora, Atabae no Loes, tomate sosa husi Baucau no hudi ami sosa husi Same, lakeru Javanes ami sosa iha Ainaro, foremungu ami sosa husi Suai, batar ami sosa husi Natarbora,” Diretór, informa.
Tuir nia, hanesan emprezariu timoroan, nia senti kontente tebes tanba bainhira tun diretamente sosa produtu lokal, komunidade sira kontente tanba merkadu maka ba buka produtu iha baze.
“Ami tun ba sosa produtu, komunidade sira kontente tebes tanba povu agrikultór sira lalori ona ba merkadoria, ita tun diretamente ba sosa iha sira nia fatin. Sira sente ekonomia ne’e sirkula iha baze no povu iha benefisiu boot ba programa ne’e,” Diretór empreza, hatete.
