Xefe Suku Vila-verde, Abdul Mancoli Aranhado hateten, iha suku refere bainhira tempu udan mak komunidade husi aldeia lima ne’e, bele asesu ba bee moos, maibé bainhira tempu bailoron sira la bele asesu bee moos, tanba komunidade sira hela iha rai lolon.
"Iha tempu udan hanesan ne'e, be'e iha, maibe tempu bai-loron aldeia lima mak terus ba bee moos,” nia dehan iha knaar fatin, Suku Vila-Verde, kuarta ne’e (30/11).
Ba aldeia lima ne’ebé seidauk asesu bee moos, nia dehan, iha ona Identikasaun husi BTL,EP no agora prepara ona atu halo kanalizasaun.
Tuir nia, BTL,EP fura ona bee ida iha Aldeia Matua, tan ne’e hein deit atu halo kanalizasaun ba tanki rezervatoriu, maibé tanki ne’e mós seidauk konstrui.
Nia informa, aldeia lima iha Suku Vila-verde ne'ebé seidauk asesu ba bee moos mak hanesan, Aldeia Terus Na’in, Mate Moris, Aldeia 01 Setembru no Aldeia Matua.
Entretantu, Xefe Suku ne’e husu ba BTL,EP atu bele kanaliza lalais perfurasaun bee iha aldeia Matua, atu nune'e komunidade sira husi aldeia lima ne’e bele asesu ba bee moos iha tempu bailoron.
Enkuantu, iha Suku Vila-Verde total aldeia hamutuk sia (9) mak hanesan, Aldeia Terus Na’in, Mate Moris, 01 Setembru, Mate Restu, Aldeia Matua, Lemorai, Gideon, Nopen, no Virgolos. Ho nia total populasaun hamutuk 16.424 no uma-kain hamutuk 3.400.
