Aban, PM Ofisialmente Inaugura Portu Baía Tibar Featured

By Novembru 29, 2022 341
Portu Baía Tibar. Foto: Media Gab.MF. Portu Baía Tibar. Foto: Media Gab.MF.

DILI: Primeiru Ministru Taur Matan Ruak, aban (30/11), ofisialmente sei inagura Portu Baía Tibar.

Tuir Komunikadu ne’ebé Online INDEPENDENTE asesu iha pajina Ministeriu Finansas, relata, iha inaugurasuan ne’e, Portu Baía Tibar sei troka Portu Díli hodi fasilita movimentu importasaun no esportasaun sasán ho kapasidade karga kontentór hamutuk millaun ida kada tinan.

“Portu ne’e inklui ka’is ida ho bersus rua ne’ebé sei uza hodi redus atrazu iha libertasaun kontentór inklui kustu tranzasaun atu fasilita efisiénsia servisu alfandegáriu no atividade komérsiu,”haktuir komunikadu.

Enkuantu, efisiénsia ne’e, konsidera hanesan pasu importante ida ba Ministériu Finansas iha ámbitu Reforma Fiskál no Jestaun Finansas Públikas, ajenda Reforma importante ida ne’ebé inísia ona desde tinan 2015 no Oitavu Governu Konstitusionál lideradu husi Primeiru-Ministru, Jenerál Taur Matak Ruak komprometidu atu kontinua implementa.

Nune’e, efisiénsia hirak ne’e mós sei ajuda Governu liuhusi Ministériu Finansas atu kolekta reseitas ho maneira ida ne’ebé justu, lais no transparente hodi’a ajuda redus país ninia dependénsia ba Fundu Minarai.

Entretantu, Portu foun no modernu ne’e, sei fasilita Timor-Leste ninia konektividade marítima iha rejiaun Ázia, liga Timor-Leste ba merkadu komérsiu globál no hasa’e liután país ninia asesu komérsiu ba merkadória sira hanesan agrikultura, turizmu, peskas, pekuária nomós indústria sira seluk, no dalan ida atu ajuda Timor-Leste diversifika ninia produsaun.

Ho nune’e, konstrusaun Portu Baía Tibar ho modalidade Parseria Públiku-Privada (PPP-sigla Ingles) entre Governu Timor-Leste ne’ebé aloka dolar amerikanu millaun $130 iha Fundu Viabilidade (VGF-sigla Inglés) no Timor Port, subsidiáriu husi Bolloré ho dolar amerikanu millaun $150, hamutuk millaun $280 ba faze inísiu husi totál investimentu estimativu millaun $500 ba tinan 30.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV