"Kada tinan ita sempre selebra loron feto maibé ha'u hanoin ita tenke valoriza feto maluk sira hotu iha sosiál no mós vida polítika," dehan nia, iha salaun MSSI, Kaikoli, segunda horiseik (08/11).

Enkuantu, TL mós ratifika ona konvensaun direitu feto nian atu bele fó protesaun no valoriza feto sira iha situasaun ne'ebé difisil.

"ita haree sei iha diskriminasaun hasoru feto, maibé atu valoriza ne'e sei mínimu ba prinsípiu igualdade Jéneru,” dehan nia.

Nune'e, Ministra dehan feto sira iha TL tenke kontinua esforsu iha prosesu saida de'it hodi bele dezenvolve nasaun TL.

Tanba ne'e, feto sira tenke pasiénsia brani foti desizaun hodi halo asaun iha vida polítika no mós iha sosiedade.

Iha parte seluk, Sekretáriu Estadu Igualdade no Inkluzaun (SEII), Maria José da Fonseca Monteiro de Jesus hatete, loron nasionál feto iha atu fó nafatin onra ba feto sira ne'ebé mate iha funu no iha frente oioin.

Maski nune'e, oras ne'e feto sira barak mak hetan violénsia diskriminasaun maibé feto no mane tenke hamutuk hodi asegura katak TL mós iha direitu hanesan.

"Timoroan sira feto no mane tenke goza nia direitu hanesan labale simu violénsia hasoru feto iha sosiedade,” dehan nia.

Iha fatin hanesan, Xefe Kaza Sivíl Prezidénsia Repúblika, Francisco Maria de Vasconcelos hateten, feto sira tenke organiza ida-idak nia aan hodi hasa’e koñesimentu iha prosesu demokrasia no iha sosiedade.

Nia dehan, feto sira mak sai importante liu iha uma laran kompara ho mane ne'ebé sai xefe família.

"Feto tenke hatudu iha kbiit rasik, ha'u hakarak dezafia ita boot sira tenke hatene valór diskriminativa iha uma laran rasik," dehan nia.

Ho nune’e, Prezidente Repúblika no Governu hamutuk atu lori prosesu ba oin, atu laiha feto no mane mak iha kotuk.