Atensaun husi instituisaun hirak ne’e mosu hafoin jornal INDEPENDENTE públika feto na’in tolu ne’e nia sofrimentu.

Amika nu’udar inan-nurak ho idade tinan 25 ne’ebé nia laen soe ona no durante tinan barak nia laran hela de’it iha nia tia nia dapur aldeia Suhurama, Lahane Osidental, Dili. Istoria husi Amika jornal INDEPENDENTE públika iha 5 Outubru 2021 ho titlu “Amika, Inan-nurak ne’ebé Hela iha Tia Nia Dapur”.

Izabel Soares Vieira faluk ida ho idade tinan 52 ne’ebé durante tinan barak nia laran hela iha uma aat iha aldeia Suhurama, Lahane, Dili. Notisia kona-ba Izabel públika iha 12 Outubru ho titlu “Esperansa husi Uma Mean Lahane”.

Ilda da Cruz faluk ida ho idade tinan 54 ne’ebé durante ne’e esforsu an mesak pinera rai henek no tuku fatuk iha mota laran iha area Lemokari, Manleuana, Dili. Istoria husi Ilda públika iha 29 Outubru 2021 ho titlu “Ilda Nia Luta iha Mota Laran”.

Iha 9 Novembru, horseik, iha ambitu komemorasaun Loron Feto Nasionál ne’ebé monu iha 3 Novembru, Prezidente Repúblika oferese subsidiu $500 ba kada ema atu bele hakbiit sira hodi halo negosiu.

Hafoin simu subsidiu, feto na’in tolu ne’e agradese ba jornal INDEPENDENTE ne’ebé públika sira-nia istoria nune’e sira bele hetan atensaun husi na’i-ulun sira.

Ba subsidiu ne’ebé simu, Amika ne’ebé tama ona iha faze livre teoria hatete, sei uza osan refere hodi finaliza ninia estudu iha Universidade Oriental Timor Lorosa’e (UNITAL).

“Osan ne'e ha'u sei rai iha banku par atu rejistu ha'u-nia eskola tanba ha'u atu loke kios mós ita hela ho ema ne'e ha'u sente labele," dehan nia iha palasiu prezidensial Bairo-pite.

Enkuantu, Ilda promete sei uza osan ne’ebé nia sumu husi PR Lú Olo atu hala’o negosiu hodi bele sustenta nesesidade uma laran no oan sira-nia estudu.

“Osa ne’e ha'u hakarak halo negosiu par haree ha'u-nia oan sira eskola to'o universidade," dehan Ilda ho oin-mida.

Iha fatin hanesan, Prezidente Rede Feto, Zelia Fernandes hatete, subsidiu ne'ebé PR oferese ho inisiativa atu hakbiit feto sira ne’ebé sempre esfosu mesak buka osan hodi bele sustenta nesesidade loroloron nian.

"Subsidiu ne'ebé Prezidente Repúblika fó ne'e atu sira bele halo negosiu kiik tanba situasaun naruk ne'ebé sira infrenta maibé sira kontinua halo servisu ho sira-nia kapasidade rasik atu sustenta familia" dehan nia.

Ba tinan ne’e, nia dehan, iha kbiit laek na’in lima mak hetan oportunidade uluk hodi simu subsidiu.

"Ohin ne'e ita identifika na’in lima, ami koopera ho media hodi hili sira par bele hetan sibsidiu," dehan nia.

Ba oin, nia hatutan, Rede Feto ho Sekretariu Estadu ba Igualdade no Inkluzaun sei servisu hamutuk hodi haree preokupasaun kbiit laek sira iha baze.