Diretór Servisu Edukasaun Munisipiu Likisa, Zito António, hatete, eskola 15 ne’ebé atu konstrui iha tinan ida ne’e, iha eskola rua mak prossesu liu husi tenderizasaun aprovizionamentu no eskola 13 ne’e liu husi grupu komunidade ne’ebé forma husi eskola sira, nune’e grupu sira ne’e mak sei lidera prossesu reabilitasaun.
“Eskola 13, ita asina ona kontratu ho MEJD, tanbá ne’e mak ita tama ona iha faze preparasaun konstrusaun nian bainhira orsamentu tranfere mai iha ita nia konta bankária,”dehan nia ba Online INDEPENDENTE, iha knar fatin, segunda horseik (08/11).
Enkuantu, totál orsamentu ne’ebé atu utiliza hodi konstrui eskola 13 ne’e hamutuk dolar amerikanu tokon U$1.1.
Entretantu, Diretór Adjuntu ESG Likisa, Daniel Siqueira Alves, hatete, iha tinan ida ne’e sira hetan apoiu husi Governu liu husi Ministériu Edukasaun Juventude no Desportu, hodi halo konstrusaun ba sala de aula 6 iha eskola refere.
Total sala de aula iha ESG Likisa hamutuk 12, ho nune’e, sira hato’o ona proposta ba Governu, iha tinan ne’e sei konstrui tan sala de aula 6, ho totál estudante iha tinan ne’e hamutuk 1.735.
Asistente Editor: Saturnina da Costa
