Ho nune'e, Konfederasaun Sindikatu Timor-Leste (KSTL), kinta ne'e (21/11/24) realiza workshop hodi promove konvensaun OIT Numeru 190 ho tema “Hamriik hamutuk bá ratifikasaun konvensaun organizasaun intenasional traballu númeru 190 no hamutuk luta ba ambiente servisu ne’ebé seguru no saúdavel".
Prezidente KSTL, Almerio Vilanova hatete, ko’alia konaba violensia no asediu iha mundu traballu, dadaun ne’e sai preokupasaun ema hotu nian. Tanba iha mundu, inklui Timor-Leste traballadór barak mak afeita ba situasaun violensia no asediu.
“Tanba ne’e ohin loron liu husi workshop ne’e atu fó koñesimentu ba traballadór no publiku sira importansia husi konvensaun ne’ebé mak espesifiku koalia konaba violensia no asediu iha mundu traballo, ne’e foin dalauluk konvensaun ne’ebé mak adopta iha tinan 2019," dehan nia iha Salaun Luz Clarita, Formoza, (21/11/24).
Reprezentante Diretór Jerál SEFOPE, atual Diretóra Nasional Relasaun Traballu, Clementina de Araújo Almeida, hatete, relasiona ho asediu ho violensia, la’os akontese de’it ba traballador sira, maibé akontense mos bá funsionario públiku sira.
“Atu evita hahalok hirak ne’e, presiza instituisaun hotu-hotu nia partisipasaun atu luta bá konvensaun ne’e, nune’e bele ratifika hodi proteje ita hotu la’os traballadór deit maibé proteje ita hotu ne’ebé iha mundu traballo,” Katak Diretora.
Iha fatin hanesan, Reprezentante Diretór Jeral Sekretaria Estadu bá Igualidade, atual Xefe Departamentu Ralasaun Públika no Parseiru Dezenvolvimentu, Hermenio Xavier hatete, Sekretaria Estadu Igulidade nafatin halo esforsu ho entidades hotu liuliu ho SEFOPE konaba ba mundu traballu, no oinsa atu dezenvolve lei traballu ne’ebé sensivel ba asuntu jeneru.
Entretantu, partisipa iha workshop ne’e organizasaun sindikatu traballu, sosiedade sivil, traballdor, juventude no estudante sira.