“Rezultadu votasaun bá final global á-favor 42, kontra 23 no abstensaun zero, hodi nune’e, Orsamentu Jeral Estadu Pasa,”dehan Prezidente Parlamentu Nasional, Maria Fernanda Lay, iha Plenaria kuarta ne’e (20/11/24).

Hafoin OJE 2025 hetan aprovasaun iha final globál, Vise Prezidente bankada FRETILIN, Maria Angelica Rangel hatete, FRETILIN iha konsiensia katak, dékada ida agora, tinan 5 to’o 10 oin mai, importante tebes ba vida kontinuidade estadu Timor-Leste nian.

Nia dehan, Sé deit mak Governa iha periudu ida ne’e, iha responsabilidade bóot atu oinsa mak bele jere risku ne’ebe Timor-Leste sei hasoru, katak to’o tinan 2035, sei la iha tan orsamentu atu sustenta vida Timor-Leste nu’udar nasaun soberanu no indepedente.

"Realidade ida ne’e konfirma rasik husi IX Governu, liu husi análize no senáriu finanseiru ne’ebé hatudu iha proposta orsamentu Jeral Estadu 2025 nian, ne’ebé aprova dadauk ne’e," katak deputada

 Prezidente Bankada Partidu Libertasaun Populár Maria Angelina Sarmentu hatete, PLP  defende ema maka nu’udar sentru ba dezenvolvimentu, governasaun ne’ebé moos no loos, hodi hala’o dezenvolvimentu ne’ebé sustentável, atu nune’e bele lori prosperiedade no bem-estár ka moris-di’ak husi Povu Doben Timor-Leste, tuir Planu Estratejia Dezenvolvimentu Nasionál (PEDN) no Objetivu Dezenvolvimentu Sustentável (ODS).

“Maibe saida maka akontese durante tinan ida resin, Governasaun ida ne’e iha failansu barak sai hanesan tiha problema estruturante ne’ebé mosu iha sosiadade nia leet, tanba inkapasidade Governu ida ne’e hodi resolve”.

"Durante iha debate hahú husi jeneralidade to’o espesialidade no final global, PLP konsiente katak ameasa boot ida ne’ebé Timor-Leste sei enfrenta mak presípisiu fiskál iha tempu besik, depois reseitas husi Fundo Petrolíferu nian sei ezgota iha tinan sanulu mai," deputada haktuir

Prezidente Bankada PLP ne’e hatutan, ne’e sei mosu, tanba Governu iha tendensia hodi halo levantamentu ba Fundu Minarai liu Rendimentu Sustentavel Estimadu (RSE) Governu husu osan Billaun $2,617. Bankada PLP preokupa tanba Governu laiha  komitmentu atu asegura sustentabilidade fiskal hodi nune’e labele sakrifika futuru Timor -Leste nian.

Iha deklarasaun Bankada CNRT liu husi Deputada Cedelizia Faria dos Santos hateten Bankada CNRT fó votu a-favór bá(OJE 2025 tanba konsidera,  OJE 2025 mak ran bá povu no haree katak orsamentu ida ne’e responde duni bá  nesesidade  povu no rai doben Timor-Leste.

“Ami fó ami nian votu a-favor la’ós tán de’it ami hola parte husi Bankada Governu, ami mós hanoin katak tanba tinan 2025 mak implementasaun bá programa sira IX Governu konstitusionál nian, mak ami husu atu ezekuta ho di’ak labele haree de’it bá persentajen ezekusaun, maibé tenke konsidera mós bá kualidade ezekusaun, atu nune’e, ita nia povu tomak sente katak orsamentu ne’e laiha de’it nasionál, maibé sulin bá to’o bá iha ita nia povu sira hotu,” dehan nia.

Iha biban ne’e, Primeiru-Ministru (PM), Kay Rala Xanana Gusmão hato’o agradese bá kontribuisaun husi deputadu hotu ne’ebé mai husi bankada hotu-hotu iha Uma Fukun Parlamentu Nasionál.

Xefe Governu konsidera debate ida-ne’e hatudu debate ida ne’ebé partisipativu husi deputadu sira ho kontribuisaun, sujestaun no krítika konstrutiva bá orsamentu ne’ebé Governu aprezenta.

Tanba ne’e, Líder másimu IX Governu Konstitusionál ne’e husu bá deputadu sira atu alerta nafatin no halo fiskalizasaun másimu bá Governu iha terrenu liu-liu bá ezekusaun orsamentu ne’ebé aprova daudaun, nune’e hamutuk servi povu ida-ne’e ho di’ak.

“Ha’u halo apelu bá Deputadu sira atu fiskaliza iha terrenu bá ezekusaun orsamentu ne’ebé mak  aprova  ona ne’e tuir prinsípiu orsamentu ba  programa. Apelu mós alerta atu bolu atensaun bá ami kuandu Deputadu sira identifika falla aktu ruma má-jestaun tanba ita hotu hamutuk mak servi povu ida-ne’e,” dehan Kay Rala Xanana Gusmão.

Perante Uma Fukun ida-ne’e, Primeiru Ministru deklara katak, Governu ida-ne’e iha kompromisu bá jestaun ida transparente.

Nune’e, Primeiru-Ministru Xanana Gusmão sita mensajen Sua Santidade Papa Francisco katak, murak me‘an ne’ebé Timor-Leste iha maka ninia ema, tanba ne’e OJE 2025 Governu tau prioridade bá Timoroan sira.

Enkuantu, Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña hosi membru meza sira no hetan prezensa hosi membru Governu sira.

Entretantu, ho aprovasaun ne’e, meza fó hikas ba Komisaun C ne’ebé trata asuntu Finansas Públikas mak sei elabora redasaun finál antes haruka bá Prezidente Repúblika hodi promulga.