Haree ba kazu ne’e, Brigadeiru Jenerál FATINTIL Forsa Defeza Timor Leste (F-FDTL), Calistro Ximenes “Mau-Nana” husu ba Polisia Nasionál Timor Leste (PNTL) atu investiga ema produs osan falsu.

“Maski temi ha’u-nia naran ho maun boot nia-naran atu inventa no politiza buat sira ne'e, ha’u husu ba PNTL atu halo investigasaun didi'ak hodi hatene autór ba kazu ne’e”, dehan nia, iha Sentru Konvensaun Dili (CCD), horisehik.

Tuir nia hatene, kazu ne’e uluk akontese iha fulan-Janeiru 2020 liubá ekipa ida husi Servisu Informasaun Polisia (SIP) halo investigasaun ba ema ida ho naran Bruno, iha Indonézia.

“Tanba saida mak sira halo investigasaun haree ha'u nia-naran no dadus no temi ha'u-nia naran nusa mak sira labele mai investiga ha'u? Depois ba politiza fali buat ne’e iha média sosiál”, lamenta Brigadeiru Jenerál Mau-Nana.

Nia rasik prontu aprezenta kazu ne'e ba komandu PNTL para halo investigasaun, liuliu husu ba membru PNTL ne’ebé halo investigasaun iha Indonézia atu labele halo propaganda polítika.

“Sé mak Bruno ha’u la koñese nia, tanba ha’u la servisu hamutuk ho nia, no ha’u seidauk atu haruka nia ba halo osan falsu”, tenik nia.

Tuir Mau-Nana, atu ne’e hanesan difamasaun ba nia ho Xanana Gusmão, tanba ne’e sei haree atu halo investigasaun ba sira.

Entretantu, Bankada FRETILIN konsidera sidadaun balun ne’ebé produs osan falsu iha Indonézia hamonu dignidade Timor-Leste nian iha mundu internasionál.

Ne’e duni, Vise-Prezidente Bankada FRETILIN, Francisco Miranda Branco hateten, sidadaun hotu presiza mós reflesaun hodi hadook-aan husi tentativa krime organizadu atu hafo'er nasaun nia naran.

“Ami husu ba governu tenke foti medida forsa hapara pratika sira hanesan. Ami mós sidadaun patriota sira hamutuk governu hodi kombate hasoru pratika krime ne’ebé hamonu nasaun nia naran,” dehan nia.

Iha fatin hanesan, Prezidente Bankada CNRT, Duarte Nunes hateten, kazu produs osan falsu ne’e akontese iha Indonézia, tanba Bruno hela iha ne’ebá kleur ona.

“Ha'u hanoin ita akompaña polisia investigasaun mós to’o ona iha ne’ebá, informasaun ne’e klaru konserteza fiar katak polisia mós hatene… Ha'u espera Parlamentu bele husu Komandante Jerál Polisia bele mai esklarese,” dehan nia.

Nia deskonfia keta iha interese polítika tanba ne’e presiza investigasaun hodi bele hatudu faktu ruma.