“Ha’u sujere ba iha Konsellu Ministru, atu Membru governu foti ona desizaun atu bele hapara jogu CPLP ne’ebé sei realiza tempu besik, atu ema labele lori Corona Virus tama mai iha ita-nia nasaun,” dehan nia.

Vise-Ministru ne’e dehan, solusaun di’ak kansela jogu CPLP, tanba husi membru CPLP balun mós afeta ona virus ne’e, inklui Indonézia mós afeta ona.

Iha fatin ketak, Deputada Bankada FRETILIN husu governu kansela jogu Comunidade País da Lingua Portuguesa (CPLP), ne’ebé planeia atu halo iha Timor tinan ne’e.

Deputada Bankada FRETILIN, Lídia Roberta dos Santos hateten, Timor-Leste tinan ne’e sai uma na’in ba jogu CPLP, maibé haree kondisaun Timor-Leste nian maka sujere atu bele kansela.

Haree ba ita-nia kondisaun ne’ebé iha karik, iha momentu oportunu ba tinan oin mai ita bele realiza fila-fali,” dehan nia.

Entretantu, Ministru Reforma Lejizlativa no Asuntu Parlamentár (MRLAP), Fidelis Leite Magalhães hateten, sujestaun kona-ba kanselamentu atividade jogu CPLP sei konsidera tanba Sekretáriu Jerál Organizasaun Nasoins Unidas (ONU) mós rekomenda atu enkontru simeira sira kansela hotu relasiona ho COVID-19.

“Organizasaun rejionál no mós olímpiku sira kansela. Ne’ebé ha’u hanoin ita kansela mós la’ós buat ida úniku, ne’e preokupasaun normál liuliu iha tempu ida ne’e,” dehan nia.

Nune’e, OMS husu país sira atensaun ba COVID-19, tanba seidauk iha ai-moruk ruma ne’ebé bele kontra virus ne’e rasik.