Prezidente Bankada CNRT, Duarte Nunes hatete, tuir lei bainhira PM hatao'o pedidu demisaun, PR sei foti desizaun, bainhira simu pedidu demisaun refere signifika viabiliza ona governu foun.

“Ita haree primeiru ministru hato'o ona pedidu demisaun signifika viabiliza ona formasaun governu foun atu prezidente repúblika dekreta PM (foun),” dehan Duarte iha PN, Kuarta (04/03).

Nia dehan, koligasaun foun preparadu no husu ona audiensia ho prezidente repúblika.

Kona-ba lista membru governu, Duarte dehan, koligasaun foun foin bele aprezenta lista membru governu bainhira Prezidente Repúblika dekreta ona Primeiru Ministru.

"Kuandu PM hato'o ona karta demisaun ne’e kompetensia Prezidente Repúblika nian simu ka la simu, maibé agora maioria koligasaun iha ona, tuir nia dalan atu forma governu," dehan nia.