Ministru Administasaun Estatal (MAE), Tomas Cabral hatete, preparasaun governu nian kona-ba fatin sira ne’ebé papa atu hala’o atividade ba atinje ona pursentu 80.

Nia dehan, nia parte ba hasoru Prezidente Repúblika atu hato’o preparativus ba vizitasaun Papa Francisco nia kona-ba kondisoens saida mak presiza prepara iha Tasi-Tolu, Centru Convensoens Dili (CCD), Katedral, inkliu mos enkontru bilateral iha Palasiu Prezidensiál.

“Ami informa ona ba Prezidente Repúblika husi Dioseze CET hamutuk ho komisaun organizadora. Ita hahú mós prepara kondisoes ba vizitasaun Amu Papa nian,” Dehan Ministru iha Palasiu Prezidensiál Ai-tarak laran, Kinta (18/07).

Nia hatutan, preparasaun ne’e, hela de’it fulan ida, tan ne’e espera, to’o iha inisiu fulan-Setembro preparasaun hotu sei la’o di’ak liu tan.

“Preparasaun ita atinji 80%, ita falta tan fulan ida to’o Setembru sasan hotu iha Dili ita bele organiza di’ak liután ba vizitasaun amu Papa nian,” dehan Ministru.

Governante ne’e mós afirma, iha enkontru ne’e Prezidente Repúblika husu atu halo preparasaun ho di’ak to’o susesu, tanba ne’e presiza ema hotu nia kontribuirasaun.

Entertantu iha enkontru ne’e, partisipa mós husi Polísia Nasional Timor-Leste (PNTL), no Prezidente Autoridade Munisipál (PAM) sira.