DILI: Ministru Juventude, Desportu, Arte no Kultura, Nelio Isaac Sarmento hatete, ekipa Komisaun Tékniku Apoiu husi Komunidade Ko'alia Lian Portugés ne'ebé mai observa ona Timor-Leste ninia preparasaun ba eventu jogu CPLP orgullu tanba TL mós preparadu no iha kondisaun ne'ebé garante.
Ministru dehan, ekipa Komisaun Tékniku Apoiu (CTA-Sigla portugues) ninia observasaun kuaze di'ak so iha preokupasaun no rekomendasaun uitoan ba estádiu, hoteis no haree-nain ba jogu refere.
"Ekipa CTA ninia rekomendasaun kuaze kapás tebes, sira mós orgullu no admira ho Timor nia kondisoens, klaru katak sira preokupa oituan ho stadiu munisípal tanba sira haree ba buat sira iha ne'eba, maibé horseik hodibainrua kompañia tama ona iha ne'ebá no ita tau ida-ne'e ba projetu emerjensia tebes, iha fulan hirak nia laran antes fulan ida ba jogu CPLP Estadium munisípal iha kondisoens para uza , tanba estadium munisípal ita uza ba abertura no enseramentu jogu CPLP," dehan ministru Nelyo, iha Xanana Sport Center, (01/03).
Ministru dehan, dadaun ne'e ida-ne'e mak Governu halo no Governu iha esperansa katak kompañia ne'ebé sai parseiru ba Governu atu apoiu ba fasilidade jogu CPLP ne'e sei finaliza estádiu tuir tempu molok jogu CPLP ne'e la'o.
"Aléinde ne'e mós sira preokupa oituan ho hoteis sira, ne'e sira preokupa oituan ba hahán, maibé ita-nia komisaun nasionál prepara hotu ona , depois ita sei kordena ho vise PM, ne'ebé sei hamutuk ho setór Turizmu para oinsá sira bele kontribui ba iha jogu CPLP ne'e rasik, no responsável ba pedidu ne'ebé mai husi kada pais membru sira ne'ebé hela iha Hotel", nia dehan.
Nia hatutan, Governu prepara Hotel 8 ba atleta no ofisiais sira atu hela.
"Ita iha Hotel 8, tanba ita lakohi estadu membru sira balun mai hela hotel di'ak balun mai hela hotel la di'ak ne'e lae, ita hakarak sira mai hela Hotel ho standar ne'ebé hanesan", nia dehan.
Nia akresenta, depois fulan Maiu TL simu ona naran lista atleta sira-ne'e kompletu, para sira aprezenta ona ho dokumentus kompletu.
"Nune'e ita hatur kedas ona katak país ida-ne'e hela iha Hotel ida ne'e no País ida seluk hela iha Hotel ida-ne'e. Nune'e bainhira sira husi ne'ebá mai to'o iha aeroporto sira lalika hein kleur tan iha ne'ebá maibé to'o sira foti dokumentus entrega xafe ba sira hodi ida-ida ba deskansa iha sira-nia fatin. Ida-ne'e mak kondisoens ne'ebé ita prepara", nia informa.
Nia hatutan, ekipa CTA ninia preokupasaun ida tan mak oinsá penontong sira atu ba nonton, sira dehan se bele Timor bele uza tiket.
"Maibé ha'u dehan se ita uza tiket ne'e ita mate ona, ne'e sira sei la ba nonton, maibé sira mós dehan bele mós uza alternativu seluk ne'ebé ita komisaun internal ne'e trasa hela hanoin balun no ita sei buka sponsor balun atu apoiu nune'e karik iha posibilidade sira bele sai sponsor i ita mós bele hetan feedback balun husi keuntungan ne'ebé ita halo iha jogu CPLP ne'e", tenik.
