Xefe Estadu preokupa makaas tanba osan ne’ebé foti husi fonte orsamentu úniku fundu petrolíferu sempre liu porsentu tolu (3%).
Lamentasaun ne’e Prezidente Repúblika hato’o bainhira soru-mutu ho Prezidente Parlamentu Nasionál, Arão Noe de Jesus, iha Palásiu Prezidensiál, Bairru-Pité, horisehik.
“Prezidente Repúblika preokupa uitoan kona-ba orsamentu ne’e boot biliaun USD $1.95, entaun Prezidente Repúblika preokupa tanba ita foti liu beibeik 3% ne’ebé lei la fó”, dehan Arão.
Maibé, nia dehan, hein Governu justifika didi’ak atu bele kobres ba asaun sira ne’ebé interesante ba nesesidade báziku sira.
Tanba ne'e, Arão dehan, vizita ne’ebé Xefe Estadu halo ba munisípiu tolu hanesan Lautem, Vikeke no Kovalima fasilidade públiku, liuliu eskola no saúde kondisaun la di’ak.
Antes ne’e, iha Reuniaun Konsellu Ministru (KM) Governu aprova ona finál OJE tinan fiskál 2020 ho montante biliaun USD $1.95 atu kobres ba programa prioridade nasionál ne'ebé define ona, maibé liu tiha Rendimentu Sustentavel Estimativa (RSE).
Husi osan biliaun $1.95, fahe ba kategoria lima, hanesan Saláriu no Vensimentu $241.271, Bens no Servisu $738.428 Transferénsia Publika $457.773 Kapitál Menór $53.267 no Kapitál Dezenvolvimentu $459.260.
Tuir Ministra Finansas Interina Sara Lobo Brites hateten, proposta orsamentu ba tinan 2020 nian ho montante biliaun $1,95, ne’ebé liu husi RSE.
“Ita foti liu tiha Rendimentu Sustentavel Estimativa maibé kalkula ba oin nia projesaun ne’e tokon $536.8 ne’ebé foti liu RSE tokon $929.9 no husi fundu petrolíferu biliaun $1.456 atu reforsa finansas husi tijolu tokon $200”, dehan Ministra Finansas Interina, Sara Lobo Brites.
Nia dehan, OJE tinan fiskál 2020 nian sa’e tanba diskusaun iha Komité Revizaun Orsamentu Polítika (KROP), ministériu hotu aprezenta sira nia proposta adisionál ho montante millaun $750 ne’ebé presiza fó atensaun.
Nesesidade importante liu atu fó atensaun mak sosa ambulánsia multi-funsaun ba munisípiu hotu ho kompleta tanba viatura sira daudaun ne’e laiha ona kondisaun tula pasiente sira.
Alende ne’e, iha setór edukasaun, presiza konstrui no hadi’a sala aula, formasaun profesór no projetu komunitaria atu hadi'a maluk kbiit laek nian uma inklui hadi'a postu polisia iha fronteira no komunitaria sira.
Ministra ne’e esklarese, iha osan emprestimu sira ne’e sei haree liu área estrada atu halo konetividade nian ba tinan 2020 nian.
Nia dehan planu prioridade sira mak tau importánsia ba área saúde, edukasaun, área sosiál no agrikultura no infraestrutura, hanesan estrad, bee moos no saneamentu.
“Orsamentu nia kontribuisaun boot mak ba área dezenvolvimentu petrolífera nian ne'ebé presiza tau atensaun ba ita nia tasi ho sosa ró boot sira halo patrullamentu ba fronteira marítima,” tenik ministra.
Governu sei investe makas ba Timor Gap ba atividade ne'ebé sira atu hetan ba dezenvolvimentu liuliu esplorasaun mina rai nian iha Tasi Timor.
