Hanesan akontese ba St. Thaddeus International School, durante iha prosesu aprendizajen hanorin ho lian inglés, maibé to’o iha ezame nasionál Ministériu Edukasaun distribui matéria ho lian Portugés.

Situasaun ne’e difikulta tebes estudante sira iha prosesu ezame. Matéria iha ezame hotu-hotu hanesan maibé difikuldade ne’ebé sira enfrenta maka lian ne’ebé sira la aprende iha prosesu hanorin nian.

Rosalia Sing, estudante finalista St. Thaddeus International School hateten, sira loron-loron aprende matéria sira ho lian inglés hotu, maibé to’o ezame nasionál matéria sira ho lian portugés. Sira mós aprende portugés maibé ne’e hanesan matéria semestre ida nian.

“Ami sente ezame nasionál ne’e difisil tanba loron-loron ami aprende de’it lian inglés to’o ezame nasionál uza fali lian portugés”, dehan nia, iha Vila-Verde, horisehik.

Nia esplika, sira hetan revizaun matéria ezame nasionál husi profesór sira iha eskola Nicolau Lobato, maibé difisil tebes tanba besik ezame maka foin halo revizaun ba matéria ne’ebé introdús mós ho lian portugés.

Nia rasik laiha serteza atu bele pasa ezame nasionál ka lae, tanba lian ne’ebé sira aprende ho lian iha matéria ezame nian la hanesan.

Ne’e duni, Rosalia husu ba Ministériu Edukasaun atu ezame nasionál tuir mai karik matéria bele hanesan maibé lian bele tuir espesífiku eskola ida-idak nian tuir língua ne’ebé introdús iha eskola.

Iha fatin hanesan, Diretora ST. Thaddeus Internasional School, Chona hateten, estudante terseiru ano sekundária iha eskola ne’e ema na’in tolu de’it.

Husi estudante na’in tolu ne’e durante prosesu aprendizajen tuir partisipa aula iha St. Thaddeus International School, maibé to’o iha ezame nasionál inklina sira hamutuk ho estudante husi Eskola Nicolau Lobato no mós hetan akompañamentu husi profesór sira iha eskola ne’e rasik.

Jornalista diáriu ne’e tenta atu konfirma asuntu ne’e Ministra Edukasaun no Juventude Desportu (MEJD), Dulce de Jesus Soares, maibé labele fó komentáriu tanba okupadu ho servisu.