DILI:Presidente Repúblika, Fransisco Guterres Lú Olo sei fó kondekorasaun ba veteranu sira hamutuk 25, iha loron ohin ba selebrasaun Restaurasaun Independénsia Timor-Leste ba dala-17, 20 Maiu 2019.
Xefe Estadu ne’e utiliza lia-fuan Nelson Mandela nian ne’ebé hateten katak (‘Nao há caminho fácil para a liberdade’) ‘Laiha dalan fásil ba Liberdade’, iha jantar kalan hamutuk ho veteranu no mártir sira, Palásiu Nobre Lahane, 19 Maiu 2019.
“Tanba ida ne’e duni mak ohin kalan, ita halibur hamutuk iha fatin ida ne’e, hodi ko’alia no koñese di’ak liután veteranu no mártir sira-nia kontribuisaun ba ita-nia luta libertasaun nasional, liuhusi sira rasik no família mártir sira-nian,”dehan PR iha nia introdusaun.
Liuhusi loron selebrasaun Restaurasaun Independénsia Timor-Leste, ho Estadu Timor-Leste nia naran, PR Lú Olo sei rekoñese no valoriza veteranu rua nulu resin lima ho Kolar ka Medalla Orden Timor-Leste ba sira-nia dedikasaun exklusiva ba luta libertasaun. Husi sira ne’e hotu, sanulu resin tolu fó-an tomak ba luta durante tinan rua nulu resin haat tuituir malu.
Infelismente, husi luta-na’in rua nulu resin lima husi lista agrasiadus ne’e, nain sanulu de’it mak sei nafatin iha ita-nia sorin: Somotxo Matar Mimiraka (kolaborador Xefe Estadu, 24 anus luta); Sabika Besi Kulit (Primeiru Komandante Rejiaun no Sekretáriu Rejiaun II, 24 anus luta); Lenicai, (Segundu Komandante Kompañia, 24 anus luta); Bere Du’u (Komandante Pelotaun, 24 anus luta); Serasa (Komandante Pelotaun, 24 anus luta); Mau Wairia (Komandante Seksaun, 24 anus luta); Derak (soldadu, 24 anus luta); Funu Kiak (soldadu, 24 anus luta); Parli (soldadu, 24 anus luta); Atchatei (soldadu, 24 anus luta).
Husi sanulu resin lima mate ona, nain sanulu resin rua inimigu mak oho durante ita-nia luta libertasaun nasionál. Na’in tolu fila hikás ba Maromak Nia Kadunan Santu, hafoin ukun-an. Ho laran ksolok mak Xefe Estadu sei fó kondekorasaun ba saudozu sira mak hanesan, Kilik Wai Gae (Xefe Estadu Maior, mate iha guerrilla); Kaluwai (Kolaborador Xefe Estadu, mate iha guerrilla); Venâncio Ramos Amaral Ferraz (Komandante Rejiaun Haksolok, mate iha guerrilla); Ular Rihik (Primeiru Komandante Rejiaun IV, mate hafoin ita Ukun-an); Solep Solep (Adjuntu Polítiku-Militar Rejiaun III, mate iha guerrilla); Bi-doli-mau (Adjunta Polítiku-Militar Rejiaun III, mate iha guerrilla); Mausir (Komisáriu Polítiku, mate iha guerrilla); Lorsan (Adjuntu Polítiku-Militar, Rejiaun III, mate iha guerrilla); Lekas (Primeiru Komandante sexta Kompañia, Rejiaun Haksolok, mate iha guerrilla); Mer Sabala (Primeiru Komandante kinta Kompañia, Rejiaun Nakroman, mate iha guerrilla); Sama Lae (Primeiru Komandante Destakamentu Norte, Rejiaun Haksolok, mate iha guerrilla); Txaibada (Komandante Kompañia, mate iha guerrilla); Liter (Komandante Seksaun, mate hafoin ita ukun-an); Mahon (Assitente Rejiaun Polítiku-Militar, Rejiaun Haksolok); Mautino (soldadu, mate hafoin ita ukun-an).
“Imi sira ne’ebé hakoak mehi ukun-an, husik buat hotu-hotu. Imi husik imi-nia uma, imi-nia bein-estar no imi-nia família hodi hako’ak mehi koletivu ne’e. Imi-nia família sira simu imi-nia sakrifísiu ho ksolok no domin,"tuir komunukadu ne'ebe INDEPENDENTE simu.
“Kondekorasaun ne’e signifika katak Estadu rekoñese imi ida-idak ninia sakrifísiu no mós família nian.
Imi ida-idak iha esperiénsia murak rasik, atu sura ba ida seluk no ba ami hotu-hotu, ba jerasaun ohinloron, liuliu ba ita-nia joven sira, atu hatutan ba jerasaun abanbairua”.
